Chin ramkulh MP, Way Tin cu Nay Pi Daw thla khat voikhat tuah tawnmi Hluttaw Meeting kai aa thawh i a kalnak lam thluan ah, AA nih November 3, 2019 ah an tlaih tiah Vuanci U Soe Htet nih Chin World Media sin ah a chim.

Youth’s Voice thawngzamh langhter ningah, MP Way Tin hi Paletwa in Nay Pi Daw lei kal dingah tilawng (speed boat) pahnih in an kal i, Paletwa in Kyuak Daw an phak ding caan 10:00am ah phak loin, an tlau hi asi.

Sipin Vuanci U Soe Hetet nih, Atu an tlaunak hmun hrawng hi, AA pawl um tawnnak asi caah, anmah kut neh asi lai ti cu a fiang ko. Tu an tlaunak Paletwa le Kyauk Daw lam hi, umkalnak ah kan hman pengmi lam asi, hihi AA nih an kham (control) tikah, caan sau caah a tha lo. AA nih Rakhine ramkulh caah doh-thlennak an tuah ti cu kan fiang ko, nain Chin ramkulh an kan hnorsuan tukmi hi cu caan sau ca tiang theihthiam le ngaithiam awk ah a har ko tiah Chin World media sin ah a chim.

Hi kong he pehtlaih in, “Mah thawng ka theih cu ka lau taktak. Kan thinphanmi ruangah an tlau hi sihlah seh tiah thla kan cam ko. Kan ruah ning bantuk asi ahcun, hihi tuanbia ah philh khawh lo ding, belnang bantuk asi. Paletwa le Chin mipi nih kan philh khawh ti lo ding thil asi lai. Zeihmanh khondennak um lo tein an kirthan ding tu thla ka cam ko” tiah vuanci hlun Issac Khen nih Mizzima sin ah a chim ve.

BBC Burmese langhter ningah cun, tlaihmi pawl hi minung 10 an si i, cu chungah Vuanci le India rammi Kaladan Project rian tuanmi pa nga le, holh lettu pahnih zong an i tel chih.

Cun tubantuk an tuahmi hi cu doh-thlennak tiah kan raut ti lo, raalhrang cawlcanghnak asi tiah kan ruah cang tiah U Soe Htet nih Chin World sin ah a chim chap.

LEAVE A REPLY

Please enter your comment!
Please enter your name here