Chin ramkulh, Paletwa Peng Miza khuami hna cu Ralkap nih ti-rawl (ration) an phorhter hna caah, an nunnak caah tih-nung, an humhimnak kongah lungre thei asi tiah Chin Human Rights Organization (CHRO) in Salai Terah nih Chin World Media sin ah a chim.

 “Tu an phorhnak hmun hrawng hi ral an i tuknak hmun asi tikah, khuami pawl caah a humhim lo, an nunnak caah tih a nung. AA zong nih siseh ralkap lei zong nih siseh tubantuk in thil phorhter hi an tuah awk asi lo. An phorhter hna ahcun, an humhimnak tuanvo an lakpiak hna awk asi. Tucu zeihmanh humhimnak caah tuanvo piaknak a um lo. Tuhi, lo rawl tuan caan te asi tikah, khuami caah thilrit ah aa rak chuah. An rian zong a thlau hna” tiah Salai Terah nih Chin World Media sin ah a chim.

Tubantuk in Kawl ralkap nih thil porhter hi October 19 lio te khan an rak thok cang, LIB 77 in Tactical Operation a thutnak Kha Mauk khua hi, facang le meh-hang pawl cu an phorhter hna __ mah phorhter hi phorh ding a dih hlan lo poh cu pehzulhter dawh asi tiah theih asi.

Nikhat ah minugn 10 in 20 tiang an fial hna__ facang tun khat caah 8000MMK an phalh hna, cu tun khat cu minung pahnih nih an i then i an phorh tikah minung pakhat nih 4000 MMK lawng an hmuh, an phorhnak khual lam hi KM 50 tluk a hlat tikah, tangka an pekmi hna hi a phu lotuk khi asi.

An fialmi hna hi pa deuh an si ko nain, milu a zat lo ahcun nu le kum 50 leng upa zong an fial ko hna tiah Terah nih cun a chim chap.

Hi kongah, Miza khua bawi nih, “A cheu nih cun an phor duh lo, nain a cheu nih cun a phorh duh ve ko. Nain, phorh lo zong cu a ngah lomi khi asi caah, an phorh ko. Kanmah khua bawi rian tuantu pawl nih minung kan kawlpiak hna. Kanmah caah zongah harnak tampi kan tong, ziah ti ahcun khuami nih phorh an duhmi asi lo tikah” tiah Chin World Media sin ah a chim.

__ Source: Chin World Media

LEAVE A REPLY

Please enter your comment!
Please enter your name here