Chin ramkulh, Tedim peng Tungzang khua siang sang run (High School) le rian tauntu pawl umnak inn pawl cu mei nih a kangh tiah the Voice nih a tial.

Mei hi October 12, 2019 chun suimilam 12:00 hrawng ah aa thok i, zaanlei suimilam 2:00 tiang hrawng a kang tiah the Voice nih a langhter.

Mei ca cawnnak inn 182’x14’ (fts) pakhat, khaan hnih aa kawpmi rian tuantu umnak inn pa nga, khaan thum aa kawpmi rian tuantu umnak inn pakhat a kangh __ cun a chung ummi thut-dan ca-buai pawl le computer pawl le zuan rian tuannak ah hmanmi thilri pawl vialte zong a kangh chih dih. Cacawnnak inn 90’x30’ (ft.) pakhat lawng hi kangh lo in a tang tiah Sianguk bawi U Dal Cin Pau nih the Voice sin ah a chim.

“Mei aa thoknak inn hi sayama te umnak inn asi i, sianginn khar asi tikah Sayama te zong an tlung dih tikah ah a hohmanh an um lo. Cun sianginn zongah a hohmanh an um lo. Daithlan ruangah aa thokmi cu asi kho lo” tiah Sianguk bawi nih a chim chap.

A kaangmi sianginn hi siang-ngakchia 420 an kainak asi i, siangcachim, siangukbawi le rian tuantu pawl 26 an umnak asi.

Sianginn awn than tikah, siang-ngak chia pawl ca an cawn khawhnak dingah khua chung biakinn ah ca chimh chung ding le, cachim pawl zong khua chunginn ah umter chung dingin an tawlrel lio cuahmah asi tiah the Voice sin in thawng kan don.

Source: The Voice (News)

LEAVE A REPLY

Please enter your comment!
Please enter your name here