Hakha Khuathar, No. 2, BEHS (Basic Education High School) celh-tual (pumpalulh tual) ah Shopping Mall sak ding timhtuahnak cu inn tek mipi a zeimaw cu an lung tling lo tiah Chin World Media sin in thawn gkan don.

“Khuapi chung mino caah zeitluk in dah celh-hmun hi a biapit timi hi chim hmanh a haumi asi lo. A um ciami celh-hmun tha tein tuahpiak si loin, Shopping mall caah kan hman lai ti cu ka lung rawk ko. Shopping mall timi cu khuapi sining le chawleh lei mit cun a tha ko. Shopping mall a um cu ka duh ko, nain nain an tuah duh asi ahcun hmun dangdang, tu ah sangthar zong an kauh chapmi a um ko cu teh, cu kha ah cun tuah a ngah lo maw, zei ruangah dah mah a um ciami celh-hmun ah cun Shopping mall cu an sak lai” tiah Dr. Cungpi nih a chim.

Khuathar sang chung ummi cheu khat nih celh-hmun ah shopping mall tuah ding cu an lung tling ko, nain mah pawl hi lente celh a huammi le a duhmi an si lai lo cun, mah kong ah hin mi tlawmte duhnak lawng lak in tuahmi asi awk asi lo tiah Dr. Cungpi nih a chim chap.

Nain hi kongah, lamsul lei Vuanci Pu Sui Thio nih cun, “Ram pumpi ruahnak petu a rat lio ah kan chuahpi, cun cozah sin zongah chuahpi asi i, cozah nih hmunhma cu an va zoh hnu ah aa tlak tiah kan ruah. Cun sangmi an zaa tein an lung tling fawn caah hihi cu tuah awk asi ko” tiah a chim ve.

Cu lio ah khuathar sang mino Siang Mang nih cun, “Mah kaa celh-hmun ah khin, December le kumthar ah pumpalulh zuamnak kan tuah lengmang nak asi. Shopping mall nak cun, mah tual khi tha tein kan remhpiak hna sehlaw ti ka duh deuh” tiah a chim ve.

Mah Shopping mall hi cozah tangka in sak si loin, thanchonak (Development Organization) phu pawl nih tuanvo lak in an sak lai tiah Pu Sui Thio nih a chim chap.

Source: Chin World Media

LEAVE A REPLY

Please enter your comment!
Please enter your name here