Paletwa peng khuate chungin khuazei an phak theih lo in a tlaumi minung 15 an phan cang tiah CHRO in Pu Terah nih Chin World Media sin ah a chim.

“Tutiang a tlaumi hi 15 an si cang. 2018 ah khan pa hnih an tlau, 2019 ah 13 an tlau. An tlaunak hmun hrawngah a cawlcangmi AA le Kawl ralkap cungah tuanvo a um. An tlaih hna si ahcun, ziah an tlaih hna, a tlaumi hi an tam cang, an tlaih hna si ahcun an tlaihnak hna ruang hi an chim ding asi. Zeihmanh an kong theih lo asi tikah, an humhimnak kongah thinphang ngai asi” tiah Pu Terah nih a chim.

Paletwa peng, Baungwa Khua mi pali hna cu July 16 ah khan an tlau le tutiang hi an kong theih an si lo. Mah pali hna hi Kaladan hlei an donh rian an tuannak in an rak kir lai ah an tlau.

An tlaunak kong he pehtlai in, “Mah pali pawl an tlau tikah, kawl dingah khuami pawl an i thawh. An hmu hna lo, cun tuni tiang zong zei thawng hmanh kan thei lo, cu tikah an nupi le chungkhar pawl zong an thin phang ngai” tiah khua mi U Shwe Ma La nih a chim.

LEAVE A REPLY

Please enter your comment!
Please enter your name here