Chin ramkulh, Tonzaang Peng ah a hlan ah an rak tuah i tlam a rak tling cangmi rungrul zuat rian cu an thok thanthan tiah Chin World Media nih a tial.

Mah rian hi khuacaan le vawlei um tu ning zoh in tlamtlinnak kan hmu rih ko lai tiah kan i ruah chan tiah Mokhe Thanchonak pu Chairperson U Sawm Lian Pau Thang nih Chin World Media sin ah a chim.

“Tonzaang peng ahcun Bing a cingmi le Cozah rian tuanmi dah ti lo cun, tangka lut a ngeimi an um lo, cu ruangah mah rungrul zuat rian hi hlan lio zongah a rak awngmin mi asi, mah ruang ah cun mah rian hi kan thokthan lai tiah pumpak tangka hmang in Tuluk ram ah a ci kan va lak. Tuluk ah kan lakmi rungrul ei duhmi kung cu ekah pathum hrawng kan cin. A zuarnak dingah kan va dot-hlat tikah Japan le Thailand ah fawi tein zuar khawh asi. Chawleh tuahnak dingah kan tuahmi cu asi lo. Hlan lio ah rak tuah khawhmi a simi cu a tu zongah tuah khawh asi ko timi langhter duh ah zoh chun dingah kan tuahmi asi. Hmai lei ahcun mah rian hi midang zong nih an rak tuan cio te lai tiah ruahchannak kan ngei. Kaa hin vawlei zong a tha, cun thiamnak lei zongah timh cia asi ko” tiah U Sawm Lian Pau nih a chim.

Tonzang ah hin Rungrul zuat rian an rak tuan ko nain, thil man a kai ruangah aa rak kaih ti lo, cun rungrul pawl cozah nih an rak caw ti hna lo, a cawtu ding minung an um ti lo caah 2005 ah mah rian hi an rak ngolmi a si.

U Sawm Lian Pau nih cun, “Chin ramkulh ah hin ramkulh cozah nih rungrul zuat rian ah tender a auhmi a um. Nain cu an auhmi cu Tedim lawngte ah a si. Tedim ahcun an khua caan zoh tikah kumkhat voikhat lawng zuat khawh asi. Tozaang cu tu hi rian kan thok ve cang i, cozah nih kan bawm ve sehlaw zeitluk in dah a that lai. Tozaang ahcun 1975 lio tein a rak awngmin cangmi asi. Cozah nih tha tein an rak bawmh hna lo caah, rian aa rak dinmi asi. Tonzang hi a vawlei zong, a khuacaan zong a tha bik asi caah, cozah nih hin bawmhnak pe ti ka duh” tiah a chim chap.

Soure: Chin World Media

LEAVE A REPLY

Please enter your comment!
Please enter your name here