Chin Human Rights Organization (CHRO) nih an rak tuah tawnmi pum pawcawmnak ah a tha hnem ding thiamnak cawnternak timhtuahnak cu an tuahthan lai tiah theih asi.

Motorbike remh, Phone Remh, Thilthit, Zungthiamnak phunphun, Mawtaw mawngh tibantuk in pawcawmnak ah hman khawh colh ding pawl, thiamnak phun 20 leng hrawng hi CHRO nih Twe Let Project tangah mipi caah a lak tein a rak cawnter hna.

Cu timhtuahnak Twe Let Project cu 2019 in 2021 ca tiang peh dingah CHRO nih aa timh than. A tu ra laimi November thla si lo ahcun 2020 thok lei ah khin, thiamnak cawnternak pawl cu an tuah than cang lai.

UN-ECOSOC (UN-Economic and Social Council) ruahnak petu phu simi CHRO sin ah thiamnak cawn hi a duhmi poh nih cawn si loin, CHRO nih aa tinhmi khua (target khua) tete an um, cu hna cu chak lei Falam, Hakha, Thantlang, Tedim le Tonzang peng chungin khua 27 cio le a dang a tangmi Myone pali chungin khua 15 cio minung pek an si lai.

Tinhmi khua chungmi chungin ramdang ah chungkhat unau a ummi pawl hi a bik in mah thiamnak chimh dingah hin tinhmi cu an si hna. Thiamnak cawngmi pawl cu tangka khong ningcang tete le chawleh lei thiamnak tete zong chimh chih an si lai. Cun rian a tuanmi nih an herhmi bawmhnak tete zong pek chih an si lai.

Twe Let tangah CHRO nih 2017 in 2019 tiangah khan Myone Panga: Falam, Hakha, Thantlang, Tedim le Tonzang ah rian an rak tuan, nain tu 2019 in 2021 ahcun Chin ramkulh Myone pakua vialte an lut dih cang tiah theih asi.

LEAVE A REPLY

Please enter your comment!
Please enter your name here