Hakha ah bunh dingin timhmi Bochok Aung San milem cu, Hakha a phan cang i a ruah hlan ah phunnak puai an tuah cang lai tiah Chin Journal nih September 10 ah khan arak langhter.

“Bochok Aung San milem cu Hakha a phan cang. Hluttaw zungah kan fim. Hmundang ahcun Bochok Milem phun ding hi a dohmi an um. Hakha ahcun bunh ciami a um cang, cu a thingmi cu thar chuah than bantuk khi asi ko. A rak um ciami milem cu concrete in tuahmi asi caah, a rawk ngai cang. Mah milem a thar hi a kan hlutmi asi. Mah a thar hi kan bunh than lai” tiah Hluttaw Chairman Pu Zo Bawi nih a chim tiah Hakha Post langhtermi cu The Chin Journal nih an langhter.

Mah Buchok Aung San milem hi Kaya ramthen zongah bunh ding an ti nain inntek pawl nih duh lonak biatak tein an langhter.

Kanmah Chin ramkulh Thantlang zongah mah Milem hi bunh dingin rak timh asi nain, inntek mi pawl nih an duh lo caah an bunthan lo tiah theih asi.

Hakha ah bunh ding timhmi milem kongah kanmah Chinmi chungin Panglong Agreement ah min thumi pathum kan ngeih hna. Aung San milem kan bunh ahcun, a dang pathum zong hi bunh ding an si. Mah ti si loin amah ca lawng bunh cu a buai khomi asi, zeicatiah ramkhel he aa pehtlaimi asi tiah, Jacob Than nih NBI news ah a chim ve.

LEAVE A REPLY

Please enter your comment!
Please enter your name here