Kawlram chung ummi Myone 17 ah Mipi Thanchonak Timhtuahnak tuan chuah ding caah US$240 Million hman ding asi, cu hman ding caah tangka cawi dingin Hluttaw hnatlaknak hngah lio asi tiah Chin World Media sin in kan theih.

Cu thimmi Kawlram chungin Myone 17 ahcun, Chin ramkulh chungin Hakha, Thantlang, Falam le Tedim zong an i tel ve tiah theih asi __ a dang pawl cu Phiapone, Letpatta, Bo Kalay, Yeay Phyo, Tayat Chaung, Min Kin, Maw Lite, Phawng Pin, Kalay Wa, Lay Rii, La Lay le Nan Yuan pawl an si hna.

Tubantuk in timhtuahnak a um kong cu September 9 ah tuahmi Pyithuangsu Hluttaw Meeting pi ah, Zuat Khalhnak le Cinthlaknak lei Vuanci U Hlaw Kyaw in arak chuahpi.

“Mah timhtuahnak hi hmual a ngeihnak ding caah kokek harnak a ton kho deuh ding Myone pawl, cuhlan ah kokek harnak a tongmi pawl, khuati aa thlen ruangah hmailei ah kokek harnak a ton kho ding dirhmun ah a ummi, 2014 Census ning in Kokek harnak in i tawlrel dingah a tha dermi, timi pawl tahfung hman ding Myone pawl hi kan thim hna” tiah Duh-vuanci U Hlaw Kyaw nih a chuah pimi ah a langhter.

Mah thimmi Myone pawl chungin papekmi dal thum ah then an si __ a hmaisa bik ah Phiapone, Hakha, La Lay, Kalay Wa le Laung Lone pawl hi 2020 in 2023 ah tuan chuah an si lai, cun a dang pawl cu mah pawl dih in 2026 tiang tuan chuah an si lai.

Mah timhtuahnak tangka US$ 240 million chungin US$156 million cu mipi sin ah dengteo in bawmhnak pek an si lai, cun a tangmi tangka tintan peknak, tha thawhternak, thiamnak (Technology) lei thiamsangmi hlannak le a tak in tuanchuahnak caah a herhmi tete caah hman asi lai.

Mah timhtuahnak hi tlam tlinh khawh taktak ahcun thimmi Myone 17 chung a ummi milu 2 million tluk caah that-hnemnak a um lai tiah theih asi.

LEAVE A REPLY

Please enter your comment!
Please enter your name here