Tlawn veihnak lei zung (Ministry of Hotel and Tourism) hruainak le tlangtlaknak tangah 2020-2015 Chin Ramkulh caah Tourism Master plan suainak workshop an tuah tiah thawng kan don.

Hakha Khualipi, Carson Hall ah ni hnih (28-29 August) workshop cu tuni ah an thok i, Chin Ramkulh Hluttaw Chairman Pu Zo Bawi nih awn-nak bia a chimpiak hna.

Cu bantuk cun, Sinpin Vuanci U So Htet le Social Minister Pau Lwin Min Thang,cozah lei zung rian tuantu pawl, Hakha, Tedim, Matupi, Mindat le Kanpetlet lei in CSO/NGO rian tuantu pawl zong an ra tiah theih asi.

Tuni ah a bik in chimmi le ceihmi pawl cu Chin ramkulh chungah tourism lei hi zeitluk in dah a biapit, zei pawl dah Ministry of Hotel and Tourism nih a tuah cang, 2013 in 2020 Master Plan chungin zei pawl dah a biapi in tlamtlinhmi an si timi pawl an si.

Thaizing cu Ministry of Hotel and Tourism nih a hran in a suai ciami 2020-2025 Tourism Master plan zohthannak hi a bik in tuah asi lai.

“Mah tourism lei kong kan ceih lai ti ahcun, nanmah inntek mipi pawl hi nan biapi tuk. Nan hawi le zong rak sawm cio hna uh, a ho ca poh ah awnmi asi ko. Nanmah inn tek mipi pawl nih nan herhmi cu nan theih bik. Nanmah nih nan chim rel lo ahcun, a sung ding cu nanmah nan si ko. Cu ruangah thaizing zongah kan telpi rih uh” tiah Ministry of Hotel and Tourism in ramkulh tuanvo latu U Aung Phyo nih a chim.

Chim ramkulh ah hin a bik in tourist pawl an ratnak cu Kanpetlet le Mindat lei hi a si i, kum khat ah 2500 hrawng an si i, cucu Kaya Ramkulh ah a rami nak in a let in an tlawm deuh tiah tuni Workshop hmangin kan theih.

LEAVE A REPLY

Please enter your comment!
Please enter your name here