Tuni ah Mandalay Ramthen Pin Oo Lwin ummi ralkap sianginn DSTA le a dang hmun li ah Tuluk—Kawlram ramri ummi hriamtlai phu thum komh nih an va tuk hna caah a tlawm bik minung 12 tluk an thi tiah VOA Burmese nih a tial.

Naung Cho Peng, Kauh Dwin hlei cu an hrawh caah Tuluk le Kawlram pehtlaihnak lam nganpi a rawk, cu ruangah mawtaw vialte cu an kal kho lo cun, tuknak zong hi a fak rih lai tiah ruah asi.

“DSTA sianginn cu bom lung thum in an khah, Khuapi luhnak X-Ray zong bom pathum in an kah hna caah ralkap pakhat an hliamh, cun mi sawhsawh pakhat a thi tiah kan theih. Nain X-ray ah cun mi hliamhmi an um lo tiah kan theih. Cun hmunhma thianh ah an va kal tikah, Yay U Sin khua pawngah bom lung 26 an hmuh caah ralkap nih an thianh cuahmah. Naungcho khua luhnak cheknak gate pawngah minung pakhat cu mei in an khangh i an thah. Cun mawtaw pawl mei in an khangh hna. Mah a tuahtu hi TNLA an si tiah kan theih. Ralkap nih an vun kawl hna i, an in tu cuahmah ko” tiah ram pumpi duh-vuanci U Tin Myint nih a chim.

An tuknak hmun pawl cu Pin Oo Lwin ah ummi Ralkap sianginn DSTA, Asia World Tool Gate le Rit-hai si cheknak gate, Naung Cho Tool Gate, Kauk Palik Sakhan, Naung Cho hrambunh ralkap sakhan hna an si tiah ralkap thawngzamh zung nih an chim.

Tubantuk in tuknak a rak tuahtu phu hi TNLA, MNDAA le AA an si tiah ralkap lei in tuanvo ngeitu Bu-hmuh Choh Zaw Min Htun nih a chim.

Tubantuk in an rak tuknak a ruang hi Shan ramkulh Kauh Khine Pengah rit-hai sii le bing chuannak sakhan hrawhpiakmi ruang, Rakhine ramkulh ah Ye Teh Tuang peng ummi rit-hai sii le hriamnam chuhnak ruangah le AA pawl an thih lotuk ruangah asi tiah ralkap nih an chim.

Ralkahnak kong he pehtlai in TNLA in Buhmu Aih Kyaw nih “Tuzing ah hmun nga ah ral kan tu. Pin Oo Lwin ah hmun hnih, cun Naung Cho ah hmun thum. Mah kan tuknak a ruang cu Ralkap nih hin kanmah hmunhma/ram ah an rak lut. Cu ruangah kanmah lei in va tukmi bantuk in kan tuah bia asi. Kanmah unau simi phu MNDAA, AA le kanmah TNLA fonh in kan tuahmi asi” tiah a chim ve.

LEAVE A REPLY

Please enter your comment!
Please enter your name here