Ti lianh ruangah Kawlram chungah a thimi hi a tlawm bikah 65 an phan, cun minung 100000 tluk nih inn lo chuahtak in a humhimnak ah an zam tak cang __ cu harnak a tong cuahmahmi hna caah a tawlrel cuahmahmi Kawlram cozah he a herh ningin kan pek lai tiah UN nih a chim tiah VOA Burmese sin in kan theih.

Tubantuk in Kawlram chungah tilianh le vawlei cimh ruangah harnak a tong cuahmahmi hna hi UN nih bawmhnak a pek cuahmah ko hna tiah New York in UN Secretary Zungin tuanvo ngeitu EriKaneko nih a chim.

“Kawlram chungah furpi ruah ruangah minung ting khat deng hi a humhimnak ah zamter an si i, Mon ramkulh chung lawng hin minung 34000 leng an i tel tiah UN leiin kokek harnak bawmchantu OCHA nih a chim. Mon Ramkulh Paung peng vawlei cimh ruangah a tlawm bik mi 65 an thi. Inntek mipi, Myanmar Red Cross, CSO le CBO pawl hna nih an bawmh cuahmah ko hna. UN phu nih cun a herhnak ah dinti, ngandamnak lei he aa pehtlaimi pawl kongah bawmhnak a pek cuahmah hna” tiah a chim.

Cun Paung Peng, Thay Phyo Kone khua ah tlang a cimhmi kongah cun bawmchantu pawl nih kawlhawlnak an tuah lio cuahmah asi __ minung zeizat ngaingai dah an tlau timi cu an thei kho rih lo.

Tulio ah Kawlram chungin Pegu Ramthen, Kayin Ramkulh, Mon ramkulh, Yangon Ramthen, Thaningthari Ramthen hna ah ti nih harnak pekmi hna dornak thla 166 tluk sak asi i, minung 80000 dengmang cu an dor lio asi ko.

LEAVE A REPLY

Please enter your comment!
Please enter your name here