Hakha ah khua-kauh ding timhtuahnak hmun Ee-kah 678 (Acres) ah inn sak in a um-mi pawl hna hi haak-kauh in puaisa pawl he a rak ummi an si caah ri-khiahmi ni ah an i thial dih hau tiah Sipin vuanci U Soe Htet nih a chim tiah Chin World Media nih a tial.

 “Cozah nih khua-kauh dingah ningcang tein kan tuah cuahmah, cubantuk cun mipi lei zong nih ningcang tein an zulh a hau. Mipi pek dingah kan tuah cuahmahmi inn hmun ah haak-kauh in le puaisa he bawm in an rak um caah, anmah lei nih an theh/hrawh a hau” tiah Vuanci U Soe Htet nih a chim.

Inn hmun samh ding hmun ah a rak ummi inn dawng cheukhat cu thial dingah chimh hnu in an i thial ko nain, a cheu cu thial duh loin an al tiah theih asi.

Mah cozah nih hrawh ding an timhmi kongah hin, Lothlau phu (Farmer Union) lei in U Tluang Za Tling nih a chim ve.  

“Cozah nih dorh an i timh lo caah, kanmah lei zong nih kan dawr ve lai lo. A ngaingai ahcun mah hmun hi Sipin hmun zong asi lo, pipu chan tein rak tuahmi an si. Sang kip ah a dik lo ning in hmun khuartu pawl hmanh dantat loin, ee-kah 678 lawng hi hrawh ding timi cu an si (fair) lo. Cun inn ngei pawl he ceih-hmainak zong zeihmanh an tuah lo” tiah a chim.

Tubantuk in inn a thet lomi pawl cu hmai thla nithum tiang an theh lo ahcun, upadi ning tein tawlrel an si cang lai tiah Vuanci U Soe Htet nih a chim chap.

LEAVE A REPLY

Please enter your comment!
Please enter your name here