Chin ramkulh chungah Ti-thaa Mei (Hydro electric project) sak dingin Tuluk le Norway kampani he hnathlaknak kan tuah cang tiah Sinpin le Mei lei vuanci U Soe Htet nih a chim kong cu Chin World Media nih a tial.

Tuluk kampani nih pa nga, Norway kampani nih pathum, a zaa tein ti-tha mei pariat cu Chin ramkulh chungah an sak lai tiah theih asi.

 “Tukum 2019 April ah khan Norway Power nih Yaw Tiva le Chi tiva ah US$50 million dih in sakpiak dingah hna-thlaknak min (MoU) kan thu. Cun Power China nih Chin ramkulh chungah 30 Megawatt a chuah khotu Ti-thaa mei panga sakpiak dingah min kan thut. Mah panga cu, Hakha pengah pa pahnih, Thantlang pengah pakhat, Matupi pengah pakhat, le Paletwa Pengah pakhat sak ding asi. Cun Norway Power he kan thutmi telh cun a zaa te pariat sak ding a um” tiah Chin Ramkulh Sipin le Mei lei vuanci U Soe Htet nih a chim.   

Chin ramkulh chungah tubantukin ramdang kampani nih mei lei ah riantuannak (investment) tuah an duh ahcun, 30 Megawatt in a tanglei lawng hi ramkulh cozah nih biachahnak nawl a ngeih, mah ri in a cunglei cu Union cozah sin ah pehtlaihnak a tuah tiah theih asi.

Chin ramkulh chungah Ti-tha mei laknak ding hmun 17 zoh ciami a um, cu chungah pahnih hi cu a ngan pipi an si hna: cu hna cu Kalay Myo pawng 380 Megawatt a chuah kho ding Manipura ti-tha mei asi, cun a dang pakhat cu Bawi Nu tiva ah asi, a dang 14 cu a fami an si tiah Vuanci U So Htet sin in theih asi.

Manipura Ti-tha mei cu, 15% tluk sak hnu ah ngol asi nain, pehzulh in sak dingah Union Cozah sin ah an chuahpi cang tiah theih asi.

LEAVE A REPLY

Please enter your comment!
Please enter your name here