UN ah special consultative nih phung tein sawmnak in CHRO ai-awhtu pawl cu Geneva tuahmi UN Economics and Social Council ah an kai tiah CHRO Executive Director, Salai Bawi Lian Mang Facebook Timeline hmangin kan kan theih.

Salai Bawi Lian Mang nih a feceook ah “CHRO cu 1999 ah UN ah advocacy tuah kan rak ithok. Pehthliahmah te in kumchiar UN mechanism chung ah Chin miphun kong chimrel nak a rem tik poh ah chimrel asi I tukum hin kum 20 a tling. UN Economics and Social Council nih Chin Human Rights Organization cu dotla te in ruahnak pekho tubu Special Consultative Status ah cohlan kan si caah tutan cu mah kan sinak UN ECOSOC consultative status hmang in meeting ah sawm in kai kan si ve” tiah a tial.

Salai Bawi Lian Mang (Photo: Salai Bawi Lian Mang)

Cun “Voidang tawn ah cun UN I kan kai tawn mi kha budang nih accreditation pek in kan kai tawn. Tutan cu UN meeting ah kanmah Chin Human Rights Organization min te hman in kan kai I kan miphun kong kan chim rel tik ah lung a hmui khun. Khuazing Pathian nih kum 20 chung lam an kan hruai I duhsah te in le a dotdot te in kan miphun kong kan chimrel nak ah hlawhtlin nak a kan pek” tiah a peh chap.

Cun UNHCR he biaruahnak zong CHRO nih an ngei tiah Salai Bawi Lian Mang nih a tial chap. Cu kongah “Tutan ah hin thil phun hnih a tong. UN Human Rights Comission le UNHCR annual consultation cu zarhkhat chung ah ai tong. CHRO delegation min in a dang te in ton le bia kan ruah khawh mi hna cu UN Human Rights lei I Burma ah ttuanvo pek mi Ms. Yang Hee Lee he a dang te in ton biaruahnak kan nei kho. UN nih Burma ram kong ah Fact Finding Mission ah ttuanvo a pek mi hna he a dangte in bia kan iruah kho. Cu pin ah UNHCR Asia Pacific Bureau he adang tein bia kan iruah kho” tiah facebook ah a tial.

UNHCR headquarters kan len nak ah mileng nih auto ttial nak ding ca uk an chiah cu chungah cun ‘CHRO dirhmun in siseh, Chinmi dirhmun in siseh, UNHCR nih nan kan runven nak cung ah kan ilawm tuk e’ tiah ka ttial tiah Salai Bawi Lian Mang nih a tial chap.

A tanglei ah a tialmi rak rel ve

“UNHCR Asia bureau he kan iton lio ah an mah lei in upa minung 5 nih an kan tthutpi I bia kan iruah. A luancia kum 20 lio ah hika office ah hin ka rak ra I Chinmi nan kan renven a hauh nak kong kan rak inchimh hna. Kan bia nan kan lak piak I kum 20 chung UNHCR nih Chinmi nan kan runven nak cung ah kan ilawm tuk. A tu ah cun North America ah thong sawmriat 80,000 hrawng kan um I Europe ah thonghra 10,000 leng kan um. Australia zong ah thonghra 10,000 leng kan um. Mah vialte minung himnak nan kan pek mi cung ah kan ilawm ti in kan biakan thok.

Atu lio ah Chinmi biaknak lei I kan dir hmun, miphun sinak lei in kan dir hmun, le a bik in Paletwa peng in a cang mikong ah UN nih biatak te in nan kan dirkamh le nan kan runven a hau timi kan chimh hna. UN Fact Finding Mission le Special Rapporteur zong bia kan ruah khawh hna caah kan ilung si.

Abik in CHRO nih UN ah Consultative Status a neih cang caah kan mah le kan min te in kan miphun kong UN I kan chimrel caah lung a hmui khun. Kan chimrel mi hnih khat Khuazing Pathian nih thluachuah hram seh law theipar ttha tlai ter hram ko seh.”

LEAVE A REPLY

Please enter your comment!
Please enter your name here