Chim ramkulh Ministry of Immigration and Human Resources vuanci thar thimmi U Phwe Ah account in June 8 lio ah khan, tangka hlannak pakhat a cang tiah hlei tongmi Mai Ih Sanda Maan nih a chim tiah Chin World Media nih a tial.

U Phuai Aa min in tuahmi account in Mai Ih Sanda Maan cu, a fa Nurse kai liomi caah nurse thilri cawknak ah tiin, tangka ting khat a cawi tikah a cawih tiah theih asi.

 “Mah lio ah cun tangka ting khat hlei hrawng te ka ngeih caah ka cawih. U Phwe Ah account nih a ka kuatmi phone number ah khan tangka cu ka kua tiah a ti. Cu tikah mah phone number cu ka call nain, a tlai lo, phone a thlak. Cu tikah, ca in ka chawnh than tikah tangka cu laak-hruak in a herhmi phun a lo. Cutikah keimah sin i bawmh halmi cu, bawmh a herhtuk caah asi theo lai tiah ka ruah, cutikah Wave Money in kuat ngahnak ah ka va kal i ka kuat” tiah Mai Ih Sanda Maan nih a chim.

Cu kong he pehtlai in Vuan Ci U Phwe Ah nih “Mah Account kha an ka bauhpiakmi (hacked) asi. Ka hman lonak a sautuk cang. Hman zong ka hmang kho ti lo. Tu ah account thar ka tuahmi zong, cikkhat ka khar chung. Tubantuk in ka min in hlennak a chuah caah hin, peh-tlaihnak lei tuanvo ngeitu nih tawlrel piak dingah, ca pek dingin ka timh tuah lio asi” tiah a chim.

Mai Ih Sanda Maan nih “Tangka ka kuat dih in phone ka chawnh tikah phone zong a tlai ti lo. Aa manh lo i si ko lai tiah Myanmar Plaza ah ka kal than i, zanriah ka ei. Myanmar Plaza in kan inn tinnak aa hlat ngai. Cu tikah tangka ka kuatmi ka ngah than lo ahcun, ka tin kho lai ti tiah phone cu ka chawnh than tikah phone a phih cang. Phone battery a dih rua tiah ka ruah. Cu tikah kan i chawnhnak account cu ka zoh than tikah, chawnh zong a ngah ti lo, a rak ka block cang” tiah a chim chap.

LEAVE A REPLY

Please enter your comment!
Please enter your name here