Ngakchia tlaih hrem cu nun chung thong (thih hlan lo thong) dan pek ding timi upadi a hran chuah pimi  cu fehternak caah min ka thut cang tiah President U Win Myint nih a chim tiah Media Laan nih a tial.

Upadi thar ning ah kum 12 tang ngakchia le mihrut a tlaih hremtu cu kum 20 in nun chung thong tiang dan pek khawh asi cang.

A cung lei langhtermi pawl cu tlaih hrem ruangah an thih ahcun, mah tlaih hrem hmuh (Case) le mi thah/lainawn hmuh in tiza cuai an si lai caah thih daan (life sentence) zong pek khawh an si tiah upadi thar chuah pitu si vemi Amyotha Hluttaw in U Aung Thein nih a chim.

Kum 12 cung nu tlaih hrem zongah a um ciami upadi 376 ning in thong kum 20 le tangka dan pek khawh an si thiam thiam ko.

A um ciami upadi 376 nih hin kum 12 tang le mihrut pawl tlaih hremtu pawl a huapchih hna lo caah tu bantuk in upadi thar an ser hi asi.

Mah upadi thar hi tukum March 4 ah khan, Pithu Hluttaw nih an rak fehter i, March 14 ah khan Pithaungsu Hluttaw nih an fehter colh ve.

Cu bantuk in Hluttaw a cung he a tang he an fehtermi cu March 26 ah President nih a min a thut colh ve caah nunter asi cang.

Upadi hlun 376 cu a teng nge/section 3 an chap i, cun ning ahcun, “a hohmanh kum 12 tang nu le a hrutmi nu a tlaih hrem ah cun thong kum 20 siseh, thih hlan thong siseh dan pek khawh asi” tiah aa tial.

LEAVE A REPLY

Please enter your comment!
Please enter your name here