Ngaih khat pawl hi rian ah a kan duh lo cun nek le zomh teih kan tongtuk ti ruangah aa thatmi Myanmar Imperial University in ngaih khat aa duhmi pa Ko Kyaw Zin Win thihnak kong he peh tlaiin ngaihkhat pawl dirkamhtu phu pawl nih an duhnak langhternak an tuah tiah VOA Burmese nih a tial.

Cu Ko Kyaw Zin Win thihnak kongah, Myanmar Imperial University nih dik tein (justice) thil a tuah ding asi __dik tein thil tuah uh tiah duhnak langhtermi pawl nih an duhnak cu an langhter.

Ko Kyaw Zin Win nih hin, nek le zomh teih a in khawh ti lo caah kaa that lai tiah biachahnak a tuahmi hi Facebook ah a lang ko ti asi.

Cu ti a tialmi ruangah mi tampi cu an thin a khanhtuk hna caah, ngaih khat pawl hup phengtu upadi ser ding tiang in duhnak cu an langhter.

“Minung pakhat nih nunnak a pek cang. Anmah ngaih khat pawl caah zeidah kan tuahpiak ve hna lai ti ahcun, thil dik (justice) tuahpiak ve hna an hau. Zeitindah kan tuahpiak hna lai. Sianginn nih zeidah a tuah hau. Cu ti lam cun si seh ti kan duh” tiah duhnak langhtermi pakhat nih a chim.

Cun mah kongah “Mah thil cang hi lung lomh ding cu asi hrim lo. Nain mah a cangmi ruangah a thatnak lei in kan zoh asi ahcun, mah thilcang hi fim cawnnak ah hman a hau. Tubantuk thil cang ti lo dingah zeidah kan tauh lai timi kha fim kan i lak lai” tiah ngaihkhat dirkamhtu phu Colors Rainbow in Joint Director Ko Hla Myat Htun nih a chim.

Ko Kyaw Zin Win ruak cu ngaih khat pawl le a dirkamhtu pawl a zaa nih hlung-hlai tein an humh hnu ah an vui.

Kawlram ah ngaih khat phunphun LGBT pawl nek le zomhteih an tonnak zorter dingah theihternak tintan pawl tampi in tuah ding zong duhnak langhter lio ah an langhter chih.

LEAVE A REPLY

Please enter your comment!
Please enter your name here