Chin ramkulh, Thantlang cozah nih Aung San milem sak ding timhtuahnak cu an let cang tiah Irrawaddy news nih a tial.

Thantlang Sipin Kawmati Chairman Pu Ram Khar nih milem sak cu mipi nih an duh lo caah an let than kong cu tubantuk in Irrawaddy sin ah a chim.

Chin ramkulh cozah nih milem saknak ah 30 million kyats an rak thlak ah khan, inntek CSOs pawl nih biatak tein an rak doh __ mah tangka hi milem saknak ah si loin a dangdang; lam hei ti bantuk ah hman an duh.

 “Mah milem saknak caah hin tangka cu kan ngah cang, nain inn tek mipi nih an duh lo. Cu kong cu ramthen cozah sin ah thawng kan thanh hna. Nain a ngaingai ahcun, kanmah sin ah biachahnak cu pek asi ko. Cu ruangah pangpar dum sak ding in bia kan chah” tiah Ram Khar nih a chim.

Sak timhmi pangpar dum hi ekah 5 (acres) a kau lai. Milem saknak ah “mi pakhat khat nih an hlut ahcun kan sak ko lai. Nain mipi tangka cu kan hmang lai lo” tiah Pu Ram Khar nih a chim.

Tubantuk in milem sak dohnak a tlamtlin hi tlang cungmi lak ah a voikhatnak asi. A dang Mon Ramkulh, Kaya Ramkulh le Kachin Ramkulh cun, Sagain Ramthen ti bantuk ah cu inntek mipi nih an doh ko nain tein milem rak sak asi ko.

Mah thil cang hi Kaya Ramkulh ah sak ciami milem cu hrawh dingah Karenni miphun pawl nih an halmi kongah zoh chun awk thilcang pakhat asi men lai.

LEAVE A REPLY

Please enter your comment!
Please enter your name here