Rit-hai si aa thoknak hi kuak in a si tiah Kawl te nih an chim tawnmi bia a um bangin kuak hrimhrim a rak biapituk tiah Dr. Thang Hnin Lian nih tuni Hakha ah tuahmi Ramkip Rithai-sii Hmannak le Phung Ning Loin Zuarnak Dohnak Ni (The Ceremony of International Day agianst Drug) Abuse and Illicit Trafficking) ah a chim.

Cu kong he pehtlai in Dr. Thang Hnin Lian nih, “Siang cachimtu chung hrimhrim ah hin kuak a zumi an tamtuk. A ngaingai ahcun, cozah zung pohpoh ah kuak zuk a ngah lo. Cun kuak nan zuk tikah zeitindah nan ngakchia nih cun zuk lo in an um lai. An caah pei lam nan sial piak hna cu. Keimah zong zu din le kuak zuk ka duh ve ko nain, ka ngakchia pawl nih a kan cawn lai ti ka phan caah pei ka tuah duh lo” tiah a chim.

Cun rit-hai si tih-nunnak kong he pehtlai in, AIDS zawtnak a ngeimi zaa ah 37 cu rit-hai si chuhnak siring (syringe) in an i chawnh i, zaa ah 80% nih C pu (hepatitis C) hi an i chawnh tiah a chim chap.

Kawlram chungah rit-hai si hi Mirang chan lio ah mirang nih an rak luhpi i, atu ah cun Vawlei cungah rit-hai si a chuah biktu ram hnihnak ah kan i tel cang. Cun zei ruangah dah rit-hai si hi an tongh timi kong he pehtlai in ‘minung cu hneksak a duhmi kan si, a bik in mino pawl nih thil pakhat khat kha hneksak kan duh, cu hneksaknak cun rit-hai si nih tlaihmi tiang kan i chuah’ tiah Dr. Thang Hnin Lian nih a chim.

Cun rit-hai si hi phun thum in then khawh asi: thinlung a thlengtu, hit-lak in mi a rit-tertu le molh lak in mi a rit-ter tu tiah an um kong a chim fawn. Cu ti rit-hai sii tongh tikah zawtnak phunphun i lak khawh asi __ cu chung in tih nungmi AIDS, Thin Zawtnak le, lung zawtnak le cuap zawtnak hna i lak khawh asi kong a chim.

LEAVE A REPLY

Please enter your comment!
Please enter your name here