Cawkzuarnak rian in pawcawmnak a tuahmi Thang Khu Cin Pau cu Zomi Revolutionary Army (ZRA) kan si aa timi pali nih meithal in an kah caah, tuhi Kalay Myo Sizung pi ah aa thlop cuahmah lio asi ko tiah Chin World Media nih a tial.

Kah tongmi sizungah a zohkhenhtu pa cu, Chin World Media nih bia an hal tikah a tanglei bantuk in thil can ning an langhte.

“Thla 13 ah khan, kahmi pa sin ah phone a rak ring. Mataw hlan kan duh a lawng lai maw tiah an hal, cu tikah a lawng ko lai tiah a leh ve hna. Si cun kan i tong hna lai, Tong Zong ah kan um ko tiah an ti. Cu tikah kah tongmi pa inn lengah rak chuak tiah an ti, a vun chuah tikah inn leng ahcun minung pali an rak um.

Lengah kan chuak lai tiah mi pali nih cun an sawm. Cu tikah ka ra lai lo tiah a leh ve hna. Nangmah hi kanmah ZRA pawl cu meithal an ngei lo tiah nan kan ti asi ko lo maw. Hih, meithal cu na hmu maw tiah an ti i, meithal cu an hmuh sak. Mah hi zeidah asi, na tih maw tiah an hal tikah, ka tih ko tiah a leh hna. Cu tikah meithla thawng a hun rin tikah, a phei cu kuan nih a khen. Meithal thawng a theih tikah, a hawipa cu in chungin chuah a hun i tim. Cu tikah mi pali nih cun meithal in an tinh i rak chuak hlah an ti caah a chuak ngam ve lo. Cun mi pali hna cu, saikal in an kal” tiah a chim.

Tu bantuk in kah a ton hlan ah hin, an hawi le he bia an i ruahnak ah ZRA nih cun ‘meithal cu an ngei maw’ tiah, kah tongmi pa nih hin a chim taktak ko __ nain cucu neknak le zeirel lonak in chimmi khi si loin, chim sualmi khi asi tiah kah tong tupa sin in theih asi tiah Chin World nih a langhter.

ZRA nih tuzarh chungah Tedim Peng Mway Taung lei-tang thil chuak phung ning loin a lami sin zongah meithal kuan he ralrin peknak ca an kuat tiah Chin World Media thanhmi hmangin kan theih.

Cun 2017 lio zongah Sianghleirun siang-ngakchia pawl khual an tlawn lio ah an hruatu pa zong ZRA nih an auh i, an hrocer tiah Chin World Media nih a langhter chih.

LEAVE A REPLY

Please enter your comment!
Please enter your name here