May 26 ah Paletwa Peng, Maung Hna Ma khua ah Kawl ralkap (Tatmadaw) le Arakan Army (AA) kar kahnak ruangah, Tatmadaw nih hriam-ngan an kahmi nih khuami pahnih a hliamh hna, pakhat cu a hma fah ngai caah Paletwa Sizung ah an thlop cuahmah tiah Chin World Media nih a tial.

 “Tatmadaw LID (Light Infantry Division) 289, nih nizan ah khan hriam-ngan voi sarih riat bak an kah. Tuzing zongah khan voi thum voi li cu an kah chap. Atu ral an i kahnak hi, a khuakip ti awk in an i kap. Khua he aa neihnak ah AA pawl an rak lut. Cu tikah Tatamadaw pawl nih lam-hlat in hriam-ngan in an vun phomh hna. Nizan ah Maung Hna Ma khua ah khan Tatamadaw kahmi hriam-ngan nih pahnih a hliamh hna, pakhat cu a fak ngai. Atu hi Paletwa Sizung ah an thlop ko” tiah IDP (Ramchung raalzam) pawl bawmhnak petu phu in tuanvo ngeitu nih a chim.

AA le Tatmadaw pawl Rakhikne ramkulh chungah fak ngaiin an i kah hnu ah, Chin ramkulh Paletwa peng chungah tu le tu ti tluk in an i kah lengmang tikah, khuami pawl nih an khua cu an zaamtak i pawngkam ramlak le khua hna ah hmun an khuar hna tiah theih asi.

Cun “Tu lio ahcun Tatmadaw nih va kal in kah timi cu a um lo. Nain lam-hlat in an rak kah hna, khua ah a tla. Cu ti an kah tikah zei khi dik an kah duhmi si hnga, khuami pawl cu an pawngkam khua hna ah an zam, a zam kho lomi cu khua ah an tang. Cu lio ah AA pawl hi khuachungah an rak lut tawn ve caah a zual-hma ko” tiah a chim chap.

Ral tuknak ruangah Paletwa ram chung vialte ah facang phorh cu cozah nih an khap tikah, facang a chiabik hmanh hi tun khat ah thong 30 a phan cang tiah theih asi.

Tu bantuk in raltuknak a fah lio ah AA lei nih khuami pawl tlaih in kalpi a um, cun Tatmadaw lei zongin khuami pawl hramhram in rian fial le porter phorhter zong a um tiah inntekmi nih an chim.

LEAVE A REPLY

Please enter your comment!
Please enter your name here