May 23, 2019 – Lewisville, TX |

US ram laimi thongruk hrawng kan umnak Lewisville khua Library ah Lai Cauk chiah a si ve cang lai I, Library aphan mi paoh nih Laica rel ding hmuh khawh a si cang lai.

Lewisville khua hruaitu Cozah hna le CCN President Salai Sang Hu Lian an I ton hna nak in a tu bantuk in biafeh ternak an tuah hi a si.

“Lewisville Library ah Lai cauk chiah khawh a si cang lai I, kan nu le kanpa mirang ca a rel kho lo mi caah Laica te rel khawh zau a si lai. A tu hi Cauk chiah ding mi kan khawmh liopi a si” tiah CCN president Salai Sang Hu Lian nih a chim.

Lewisville ah hin Chin mi tampi kan umnak a si bantuk in Library ah sianginn kai mi Mino cheukhat cu an kal lengmang hna nain, nu le pa cu an phan hna lo. Laica rel ding ahcun, nu le pa zong Library ah an kal kho deuh ve cang lai.

“Laica in chuahmi cauk phunkip kan khomh lio a si. Cauk kan chiah khawh cun thawngthanh nak zong kan tuah than te lai” tiah Sang Hu Lian nih a chim.

Lai cauk hlut ding na duh ahcun chincablechannel@gmail.com ah ca kuat khawh a si.

Lewisville Public Library: (Google image)

Lewisville khua ah hin Chinmi tamngai an um cang nak a si. Lewisville sianginn kip ah Chinmi an tam cang caah Chin (Laiholh) cu siangsang (High school) dihnak caah a herh mi holh phunkhat ah cohlan piak an si cang.

Lewisville sianginn ah siangsang dih khawh nak dingah holh phun hnih cawn/thiam hrim a herh. Pa khat nak cu Mirang/English a si I a dang cu holh Dangdang pakhatkhat paoh cawn a herh mi a si. Nain, Chinmi milu an tam caah Chin (Laiholh) cu Foreign Language (ramdang holh phunkhat) ah phungning tein an cohlan cang. Chin (Laiholh) thiam man ah, holh dang vacawn len hau ti loin, an nunnak ah an itinh mi subject (cawnnak) ah caan an pek khawh deuh cang lai.

“Hi thil hi aluan cia caan pi khan an rak tuah cang ding a si. Lai ca cawn duhnak lungthin zong a karh ter ngai te lai. Holh dang an cawn mi khi zei pipa a chuah pi lo I an caan lam a paam. A tu cu an ca ah tamdeuh caan an pek khawh cang lai” tiah CCN in Salai Sui Ceu Ling nih a lunglawmhnak a langhter ve.

LEAVE A REPLY

Please enter your comment!
Please enter your name here