Cozah zung a tanglei ah a cangmi ei-hmuarnak pawl cu tha tein dot-hlat in, cu ei-hmuarnak ahri tlaitu zung rian sang tuan pawl cu dan kan tat hna lai tiah Ei-hmuar donak Kawmasin (Anti-Corruption Commission) Chair U Aung Kyi nih a chim tiah DVB sin in kan theih.

May 20 ah tuahmi Rampumpi Hluttaw Meeting ah, Anti-corruption Commission nih an chuahmi cathluan kongah Hluttaw nih an i ceihmi kong he pehtlai in tu bantuk in Chairperson U Aung Ko nih a chim.

“Kawlram chungah ei-hmuarnak tete an zor khawh lonak a ruang cu, cozah zung chung ah a cangmi (internal corruption) asi timi cu a fiang. Zung rian tuantu a niam deuh lei in a sang deuhmi lei ah i thuhpiaknak a um bantuk in, zung rian tuantu a niammi sin ah a cangmi ei-hmuarnak pawl cu a cunglei nih an chek hna i an hmuh hna tikah, an ei-hmuarnak cu an thuhpiak hna, cun a nem deuhmi case ah an chiahpiak hna timi cu Anti-corruption Commission nih kan hmuh” tiah a chim.

Ei-hmuarnak hi nunphung bantuk asi cangnak Kawl ram ah ei-hmuarnak kan donh tikah hin, sualnak a ngeimi tiza cuai lawngin asi kho lo, cun kanmah Anti-corruption Commission lawngin hlawh kan tlinh kho lai lo tiah a chim chap.

Mah kongah upadi sernak, uknak le biaceihnak (legislative, executive and judicial) lei ah tuanvo ngeitu vialte lungrual tein hmun khat ah kan tuan lawngah hlawhtlinnak kan hmu lai tiah U Aung Kyi nih cun a chim.

LEAVE A REPLY

Please enter your comment!
Please enter your name here