Ral lei buainak nih a den cuahmahmi hmunhma chungah bawmhnak pek tikah ralrin a hau tiah, Nu Hrin Covo lei thlingthla tu pu nih an au cuahmah lio ah, World Bank nih Rakhine ramkulh caah $ 100 million a bawmh lai tiah VOA Burmese nih a tial.

Mah kong he pehtlai in nuhrin covo buarnak tawlrelnak dingah thinphan dai lo asi, cun raalhrang zong hi kan doh, cun Bangladesh ram lei ah aa dormi Rohingya pawl caah a herh bantuk in bawmhnak a pemi Bangladesh cozah sin zongah bawmhnak kan pek tiah World Bank nih an chim.

Cu lio ah Rakhine ramkulh chungah a herhmi thanchonak caah ramkip nih bawmhnak pek ngol ding timi cu World Bank nih kan co hlang lo tiah Reuters sin ah World Bank nih an chim.

Cun tu bantuk in bawmhnak pekmi $100 milion nih Rakhine ramkulh chung ummi pawl caah that-hnemnak a chuahpi le chuahpi lo cu Kawl cozah le ralkap kut cungah tampi aa hngat tiah American-Rakhine CSO in vice-Chairperson U Thein Thang Zan nih a chim.

Timh tuahmi bawmhnak tangka hi sifah raldohnak caah tintan pek ding, rian tete serpiak hna ding le mah rian pi a tlamtlinnak dingah a tuanmi cozah bawmhnak caah kan hman lai tiah World Bank nih an website ah an langhter.

Cu lio ah hi tluk in nuhrin covo buarnak, miphun thleidannak, biaknak thleidannak le a dangdang buainak a tamnak ramkulh ah hin, zeitindah hmun-hma khuarpiak thannak le thanchonak caah bawmhnak pek timi cu a tlam tlin khawh lai tiah Nuhrin Covo thlingthlatu phu tampi nih World Bank nih tonnak a ngeih hna lio, tukum hramthok deuh ah khan an rak chim cang.

Cu lengah AA le Kawl ralkap an i kah cuahmah lio asi tikah, Rakhine ramkulh caah ramkip bawmhnak pek ding hmanh Cozah nih ri a khiah lio ah tubantuk in World Bank nih bawmhnak a pekmi hi a tlam tling kho te hnga maw timi hi bia-halnak a chuak.

__ VOA Burmese  

LEAVE A REPLY

Please enter your comment!
Please enter your name here