Bangladesh vanlawng Biman Airline cu nizan Nithum ni zaanlei 6:30 pm hrawngah Yangon Ramkip Zuannak Vanlawng tual ah a vun tum i, tliknak lam ah a naal caah minung 17 nak tlawm lo an i khong tiah VOA Burmese nih a tial.

Khualtlawngmi 29 le Vanlawng khaaltu pali a phortu S2-AGQ Bombardier Dash Q 400 phun vanlawng cu ruah ruah sur le thli hran liopi ah vanlawng tual ah a tum tiah Bangladesh ram palai (ambassador) Manjurul Karim Khan Choawdhury nih a chim.

BG 060 vanlawng nih a phorhmi hna chungin nu panga le pa 12 hna cu an i khong ko nain, an hma faktuk lo, zaan 9:00pm hrawngah North Okala Sizung ah an chiah hna tiah theih asi.

Vanlawng aa citmi pawl hi Bangladesh rammi, Kawl rammi, Tuluk rammi, Canada rammi, French rammi le Switzerland rammi pawl an si tiah Biman Airline in tuanvo ngeitu General Secretary Shakil Miraj Chowodury nih a chim.

Nikhua chiat ruangah vanlawng cu a tum lio ah, ruah lo piin vuk tiah a vun kai i a tla than, cun a hmailei ke a pawngh caah vanlawng a hmailei le a thla pahnih in a rawk tiah theih asi.

Mah Biman Airline hi Yangon le Bangladesh khualipi Dahka karlak zarh khat ah voi li lengmang a zuangmi asi.

Tuhi Ruah sur ruangah Yangon vanlawng tual cu cikkhat an phih lio asi, a dang vanlawng a rak phanmi pawl cu Nay Pi Daw vanlawng tual ah an tum lai tiah theih asi.   

__ VOA Burmese

LEAVE A REPLY

Please enter your comment!
Please enter your name here