Kawl rammi 60 hrawng cu Thailand ah rian nan tuan lai tiah an kalter hna nain, Thailand an phak taktak tikah rian dang tuan ding an fial hna caah atu hi an i tar-ta-hak ko tiah Myanmar Times nih a tial.

Minung 30 hna cu rian ngeitu nih Thailand ah Aluminum Thla-lang-awng nan ser lai tiah a chimh hna nain, an va phak taktak tikah a dang rian tuanter an timh hna tiah theih asi.

Hnatlaknak minthut (MOU) tuahnak ah thla nga kan hngah hnu ah tu bantuk in Thailand ah kan rat asi tiah, hlen a tongmi pakhat nih a chim. Minthut ning te ah cun, minthut dih hnu thla hnih chungah rian tuantu ding hi, rian hmun ah phakter ding ti asi.

Rian tuan ah a kalmi pawl cu Sehzung pakhat ah an chiah hna i, zarh khat an um chungah rawl voithum lawng an pek hna.

“Ti le rawl zong pek loin, tuhi ni riat chung kan hngah cang. Tuhi ni thum in hngak rih uh a kan ti” tiah hlen tongmi pakhat nih a chim.

Mah kong he pehtlai in, rian ngeitu Company Agile Man Power Employment Service in M.D. (Managing Director) Daw Kyi Kyi Win nih cun, Agency director pakhat anmah bawmtu dingah kan thlah ko tiah a chim.

Kawlram cozah lei in tuanvo ngeitu U San Muang Oo nih mah kong hi Thailand cozah Department of Employment si ah thawng kan thanh hna i, an nihlawh pek dingah kan nawl hna tiah a chim.

Thailand ah rian tuan dingah Kawl rammi 18,000 tluk thla khat chungah rian tuan dingah an kal lengmang tiah theih asi.  

__ Myanmar Times

LEAVE A REPLY

Please enter your comment!
Please enter your name here