Aa Khongmi Pariat Pawl cu Red Cross pawl nih An Kalpi Hna lio (Photo: VOA Burmese)

Rakhine Ramkulh, Yathedaung Peng, Kyaut-tan khua kahnak ah mi sawhsawh paruk an thi i, pa riat cu hliam-hma an pu tiah VOA Burmese nih a tial.

Arankan Army he pehtlaihnak nan ngei tiah lunghrinh in bia-hal dingah Kawl Ralkap nih an hrenmi hna khuami 270 leng hna cu Kawl ralkap nih an kah hna caah tu bantuk in an thih le hliamh-hma an put hi asi.

Lung hrinhmi khuami pawl cu Sianginn ah an hren hna __ April 3 zing 1:00 am leng deuh ah khan, tubantuk in tuknak a chuah cu asi.

“Inn chungkhar cazin (family census) chungah aa tel lomi, lunghrinhmi 275 an um. Mah pawl cu biahal dingah Sianginn ah cikkhat kan hren hna. Anmah pawl cu hlat-hlainak kan tuah hna. Tuzing suimilam 2 hrawngah khan, kan hrenmi hna pawl nih cun a bubu in an ra i, humhimnak tuanvo lami palik le ralkap pawl cu tukdoh dingin a kan zuan hnawh. Cu tikah, ralrin peknak ah kan au hnawh hna. Cun meithal zong van ah kan kah hrawnh ko hna. Nain, kan meithal chuh a kan timh cang, chuh ding kan si cang caah kan kah hna. Tutiang thawng kan theih ning ahcun, paruk an thi. Pariat hliam-hma an pu. Pali cu an tli i, an luat” tiah Ralkap lei in chimreltu Bu-hmu-choh Aw Min Htun nih a chim.

Hliam-hma a pumi pariat hna cu, kahnak a can ni chun ah khan International Red Cross nih Sittwe Sizungah an kuat cang hna tiah inntek mi pakhat nih a chim.

“Ruak cu Sianginn hmai ah, an pon ko hna. Hliam a tongmi pawl hi, an chuahter duh hna lo. A chung zongah pakhat hmanh an kan luhter duh lo. An chungkhar zong an luhter hna lo. Mah ti cun asi ko. Zeiruang ah dah an thah hna ti ahcun, Rakhine miphun vialte cungah kan lung si lo caah kan thah hna tiah an ti. Mah mi pawl hi, zei sualnak hmanh a ngei lomi an si. AA ralkap zong pakhat hmanh an i tel lo. Cun raltuknak zong a um lo. Mah lio ah khan, an pawngkam ah hohmanh zong an um lo” tiah inn tek pakhat nih cun a chim chap.

Nain, a hnu deuh ahcun mah hliam tongmi pawl cu an laknak nawl an pek hna i, Satipin khua ah an kalpi hna hnu ah Red Cross bawmhnak thawng in Sittwe Sizung ah an phanh pi cang hna.

A luan cia April 10 lio zongah khan, AA he pehtlaihnak an ngei tiah Ralkap nih an hlat-hlaimi Myo Oo Peng, Latka khuami 27 chungin pathum zong an rak thi.

Cun Kawl titoih puai a dih lei ah kah-tuknak ruangah Baung Duat khuami pakhat zong a thi.

Cun April 21 ah Buthiduang peng, Situang khua zongah hriam ngan he hriam hme he raltuknak a can ruangah khuami pa nga nak tlawm lo an rak thi i, 13 hliamh an rak tong.

Tubantuk in kahnak hi AA he kan i kap tiah Kawl ralkap nih an chim ko nain inn tek mipi pawl nih cun AA he an i kah si loin, Ralkap lei nih an kahmi hna tu asi tiah an chim.

__ VOA Burmese

LEAVE A REPLY

Please enter your comment!
Please enter your name here