IS Hruaitu Abu Bakr al-Baghdadi (Photo: New York Times)

A luan cia kum nga lio ah Abu Bakr al-Baghdadi nih Iraq Muslim biakinn pakhat pulpit cungah kai zau in, a cawlcaang cuahmahmi Muslim ralhrang phu i a lutlaitu ka si tiah aa rak phuan.

Cu thok cun amah ralhrang phu IS (Islamic State) nih buai-bainak (violence) he vawlei pi cu an hnih in an hninh lio ah amah pumpak cu zeitin a um zong theih a si ti lo.

Bia-chawk vai pawl cu a thi ti na, aa hliam tina an si ko – cu lengah US nih a lu caah $25 million an thap nain tutiang hi an ngah kho hlei lo.

Cu ti cun saupi a ruah hnu ah Abu Bakr al-Baghdadi cu tuzarh Nikhat ni ah khan, video pakhat in aa rak langh than.

Video chungah cun vampang aa hngat chan i a kam ah meithal pakhat he, Iraq le Syria hrawngah IS a thimi hna caah kan i funtom than hna lai i, pehzulh in raal kan do rih lai tiah a zultu pawl cu a forh hna.

“Tuni ah kan ral hna hi an der cuahmah ko, kan raltuknak cu kan pehzulh rih ko lai, cun mah Muslim caah raltuknak hi ni hmanung bik biaceih ni tiang a kal ko lai ti cu an theih lai” tiah video chungah cun a chim.

Mah video in bia a chim duhnak hi a fiangtuk ko __ IS kan timi hi an um rih ko, cun mah pa hi a lutlai a si rih ko i, cun ramkip IS phu pawl sin in tuk dohnak le raalhrang cawlcanghnak hi pezulh in fak ngaiin a cang rih ko lai tiah thiamsang pawl nih an chim.

Mah video hi zeitik le khuazei in dah an thlah ti cu a fiang lo nain, video chung chimmi nih nai te Sri Lanka dohnak kong hna kha a-aw (audio) in a telh, tikah video hi zarh khat a luan ciami ah thla hna sehlaw cun a-aw hi peh chih hna sehlaw a dawh.

IS nih Iraq le Syria ram chungah an ram an dirh i, Britain ram tiat hrawng a si, cun minung millions bak in an uk hna.

IS Mawtaw in An Kal Lio (Photo: New York Times)

Nain, Syria ram Baghuz hrawng ah US bawmhmi ralkap thazaang nih a vun phomh hna i, IS ram cu an lak khawh.

Cun Sri Lanka thahnak a cangmi kha Baghuz ah IS an sunghmi ruangah teirul chamnak asi tiah Video chungah Abu Bakr al-Baghdadi nih cun a chim chap.

Cu video nih a vun langhter rihmi cu Iraq le Syria ah IS pawl cu an sung cang, IS hi an dih cang lai tiah ruah lio ah, IS nih ralkap hi a thong bak in a ngeih rih ko hna ti a fiang.

Cu lengah Belgium, Australia le Saudi Arabia ram a ummi IS phu pawl cu Video chungah an min bak in a chim hna.

Ref: The New York Times

LEAVE A REPLY

Please enter your comment!
Please enter your name here