Minung 321 a that-tu Sri Lanka Khrihfa biakinn le Hotel bom puahnak hi, New Zealand ah a rak cangmi Muslim biakinn tuk-kahnak caah tei-rul chamnak asi tiah Sri Lanka cozah rian tuantu pakhat nih a chim tiah the Star Online nih a tial.

Tutan ah a cangmi Khrihfa biakinn le Hotel bom puahnak kongah, Sri Lanka cohzah nih ramleng raalhrang phu he pehtlaihnak a ngeimi ramchung hrambunh Muslim phu an si tiah an lunghrinh lio te ah, IS (Islamic State) pawl nih kanmah tuahmi asi tiah AMAQ thawngzamh sin in thawng an thanh.

IS nih kanmah tuahmi asi ko an ti nain, zeihmanh tet-te an langhter lo. Sri Lanka cozah nih bom puahnak ah hin, nunnak pek in puahmi pasarih aa tel tiah an chim.

“Dot-hlatnak kan tuah tikah, New Zealand Muslim biakinn kahnak ah lehrulhnak asi timi a lang” tiah defence minister Wijewardene nih MP sin ah a chim.  

Sri Lanka ram hrambunh, Muslim raalhrang National Thawheed Jama’ut le Jammiyathul Millathu Ibrahim tiah auhmi hna hi, tutan Bawipa Thawhthan Ni ah bom puahnak ah hin tuanvo ngeimi an si tiah Wijewardene nih cun a chim chap.

Tu bantuk in doh-hlatnak a tuahtu pawl nih hin, ramdang he pehtlaihnak an tuah i an dot-hlat tiah Prime Minister Ranil Wickremesignhe nih a chim.

Ref: The Star Online

LEAVE A REPLY

Please enter your comment!
Please enter your name here