Lam Zawhmi Pawl (Photo: Frontier)

Kawlram chaklei ummi hna nih, Myitsone tidil mangtara (mega dam) kongah lam an zawh than tiah Frontier nih a tial.

Myitsone Mangtara tidil (mega dam) cu Tuluk bawmhnak in sak dingah, Ralkap Cozah nih Tuluk cozah he 2009 lio ah khan, min an rak thut.

Tu bantuk in duh lonak an langhtermi hi, Beijing ah tuahmi China’s Belt and Road Initiative timi meeting ah Daw Aung San Suu Kyi a va kal hlan ni zeimaw aa duh ah a cang.

US $ 3.6 Billion dih in sak ding Myitsone project pi minthut a rak si i, mipi duh lonak a rak fahtuk tikah kum hnih a rauh hnu ah rak thawn (mothball) a rak si.

1,000 Megawatt tluk thaa a chuah khotu Tidil mangtara hi Ayeyarwaddy Tiva ah an dil asi ahcun, Singapore ram tluk ngan in ti a lian laic un, mi thong tampi an umnak hmun a hnorsuan hna lai.

Tutan lamzawhnak ah hin, minung 4,000 tluk an i tel i, cu leng ah a thong bak nih lamzawhnak thazaang peknak min an thut.

Nain, inn-tek palik nih cun lam zawhmi hi 3,300 an si tiah an thanh ve.

Daw Aung San Suu Kyi zong hi, 2015 thimnak ah teinak a rak hmuh hlan ah cun mah Myit Sone project hi a rak dohtu asi ve ko, nain mah project kongah hin mipi nih ‘kau deuh piin zoh ding kan si’ tiah a chim hnu in, mitampi nih cun a dirhmun aa thleng rua tiah an thin a phang ngai.

REF: FRONTIER

LEAVE A REPLY

Please enter your comment!
Please enter your name here