Laimi nih Lai lungput le ziaza hi kan i uanpi mi asi. Khrihfa lungput le ziaza zong kan uar ngai fawn.
Kan i uanpi mi le kan uar ngai mi Lai lungput, Khrihfa lungput le ziaza hi kan vun thlau ta hlah maw tiah ka ruah nak zawn te a um. 
Keimah ka hmuhton mi thil pahnih le ka hawipa pakhat nih a hmuh ton mi thil vun zoh tuah hmanh usih.

Hawikom ttha le liangden ttha;
Chinchin le Pa He cungah ka lawm.Voikhat Hakha in Kalay Myo kal kan i thawh. Falam kan phanh laite ah kan motor a rawk. A ke a kek. 
Falam ah ka hawittha asi mi Chinchin le Pa He bawmhnak ka hei hal hna. Pa He cu a mah motor tampi a ngeimi asi caah zeidah a bau tiah a ka hal i motor ke a kiakmi thlen nak he, mechanic a thiam mi he tiah Pa He le Chinchin cu an rak ra I motor cu heh tiah an kan remh piak. Thil a tlamtling lomi kong ah Falam I an hawile kha an hei chonh hna I thilri a herh mi an vun put, an kan bawmh.

Ttha tein an kan remh piak khawh i hnangam te le tluangte in Kalay Myo tiang kan kal kho. An cungah kan i lawm taktak.
Motor kan remh chung cu suimilam pa 3 renglo kan rau.

Lai lungput le Khrihfa ziaza a tlau maw?
A si nain ka khuaruah a har mi thil pakhat a um;
Lam laicer ah motor a rawk i nu he hngakchia he a dir ko mi kha suimilam pa 3 renglo chung i Hakha le Falam karlak i motor a kal mi lengluang lak ah Laimi a hohmanh nih zeidah nan can, ti hal a um lo. A dir hrimhrim an dir lo.

Suimilam pa 3 renglo lampi i motor kan remh chungah motor a kal mi hi a kir lei he a kal lei he motor 20-30 cu an si lai dah. Mah chung ahcun motor in voihnih an dir i bawmh nan haumaw tiah a kan hal mi motor 2 le Motor cycle 1 an si. An pathum tein KAWL miphun an si.

Mahkha suimilam pa 3 chung i motor 30 hrawng le cycle 50 hrawng a kal mi kha Laimi cu a tam deuh cu an va si ko lai, i Kharihfa an si fawn lai nain ahohmanh nih har nak a tong mi kha nan tluangmaw? Bawmh nan hau maw ti hal a umlo. Kawl pa3 tu nih nan har maw? Bawmh nan hau maw tiah an kan hal mi nih khua a ka ruahter mi cu; 
Laimi Khrihfa hna nih hin kan Lairam ah mizawnruah nak le mi bawmh nak thinlung le ziaza hi a um ti hnga lo maw ti ka ruat.

Mah kong cu ka hawi pa pakhat ka chimh i a ka leh mi cu;
Voikhat mah ticun ka motor Falam le Hakha kar ah zan ah a rawk, mi motor ka kham lengmang hna i an dir duh bak lo. A hnu bik meisei hnu ah khin kawl motor mawng – driver pa pakhat nih a kan char i Hakha kan phan kho e a ka ti.

Voikhat Mandalay ah ka vanlawng connection nih a ka kal tak caah Mandalay Airport in motor ka hlan i zan ah Hakha khen in ka kal. Zan asi, theih ballo mi he khual lam kal asi tik ah ralring te in ka tthu dir.

Mandalay in Monywa kan lonh ah cun zan ttim asi. Mah ah cun motor pakhat a rak rawk i a rak dir ko. A dang motor pahnih an rak dir i a remh an rak bawmh hna. Kan mah motor zong cu a dir ve, cuhnu tlawmpal ah motor a rak ra mi kip an rak dir i an i bawm. Motor an remh kawh i a kal khawh hnu ah kan mah le kan lam cio ah kan kal hna.

Laimi le Khrihfa ziaza a si rua tiah kan rak ruah mi tu kha, kawl khrihfa asilo mi nih an zulh, an i nunpi i Laimi Khrihfa ziaza asi rua tiah kan rak ruahmi mizawn ruahnak, mi va bawmh chanh duhnak ziaza kha Lairam ah a tlau sual asi hnga maw?

Atlau sual asi ahcun thinphang ngai asi. Zeica tiah mizawn ruahnak le mi bawmh duhnak thinlung a nei lo mi nih cun an mah le an mah zong an i daw taktak lo. A mah le a mah a daw lomi le aminung hawi zawn a ruat lo mi nih cun miphun dawtnak, ram dawtnak, Pathian ttihzah nak an neih lo caah an ram, an biaknak an miphun an thlau tawn.



LEAVE A REPLY

Please enter your comment!
Please enter your name here