HBC nih Ramdang Um Fanau hna caah Thlacamnak Ni caan a hmanning.

Sept. 02, 2018|  Hakha Baptist Church nih Ramdang hmundang ah rianttuan in siseh a dangdang ruang ah a ummi hna caah thluachuah hal thlacamnak ni tiah min bunh in zarhpi ni ah caanhmannak an ngei. Hi caanhmannak ah Thawngtha chimtu cu Rev. Dr. Lal Pek Lian (IBC Church Pastor) nih a chim.

Thawngtha chimmi chung in tlawmpal:-

Bible ca rel mi: Deu. 32: 10-16; Ps. 33:12

–  A tlawmbik ram 16 hrawng ah Laimi hi kan um. Kannih IBC member chung cun ram 14 hrawng ah an um. Chinmi phun hi kan rak ruah lo in Africa ram tiang kan phan. Pathian nih a miphun sersiam awk caah mah ti i a kan thek zong hi a si kho ko.

– Nehemiah nih Kan miphun mi hi kan ngai thiam ko tiah thla a campi hna bang in kan nih zong nih kan cam ve awk a ti tiah ka ruah.

– Nihin ni bantuk ahhin lung len lo awk a ttha lo mi tete a um. A cheu cu ramthumnak an phan kho lo. A cheu cu lampi hna ah an kan thih taak. tbk tampi kan ton. A cheu cu Malaysia hna ah an kan thih taak. Ni nikhat ah ruak 5 hna ka vui caan hna a um tik ah celh awk a ttha lo. Nihin ni ah a lung a lengmi nan um len ve ko lai tiah ka ruah. Cu chung cun Pathian nih a kan dawt nak hi ruah lo awk a tha lo.

– US lei nih nuncan dawh lo ruang i an rak kuatmi hna zong kha cohlan ding kan si. Nun zia dawh in kan cawmhlawm hna a herh.

– 2015 Hakha har kan ton lio ah Pathian nih kamkhat lei in an kan dawtnak a langhnak tampi a um, Hakha khua hna a kau chinchin, kan khua minung kan i chap chinchin.. Cu chung ah Cozah lawng nih an kan bawm lo. A tambik a kan bawm tu hna i ramleng um Kan Chin miphun an si. Inn le lo an kan sak piak, lam le sul hna an kan remhser piak. A phunphun in kan caah rian an rak tuan. Cucu an ngeih hlei a si hrimhrim lo. An kan dawt, an kan philh hrimhrim lo caah an ngeih chun te an pekmi a si.

– Ramchung le ramleng hi Fimnak in kan i pehtlaih ahcun Sui haang, Ngun haang… vialte kha kan miphun chung, kan khrihfabu chung ah a luang kho lai.

(a tawinak in kan lak chommi a si caah tling deuh in Video chung ahhin zoh khawh a si)

(Note: Khrihfabu kip nawnnih Ramdang um Chinmi phuncaah thlacam ni i an i ngeih pah cio. Kan phakkhawh lo caah a dang kan langhter khawh lo mi cung ah a ruahzia rak kan thiam hram uh. __ CCN Team)

 

LEAVE A REPLY

Please enter your comment!
Please enter your name here