2018 August 23 ni ah ka sining loin Sharon Par nih MIE Group le Chin News ah a ka phozaar mi kong ah a tanglei ning in mizapi sin ah ka vun fianter
===========================================

2018 .1. 3 ah Malaysia in ka hawile 6 he tlun kan i tim. Kan hawipa nih RM 950 in a tlunter mi Aung Kyaw Myin (Laimi) a um a ti i cu pa sin cun tlun kan i tim. 2018.2.3 ah puaisa AKM sin in tlun kan i thawh. RM 150 nan chap lai a kan ti than ca ah kan chap. Motor aa rawk a ti ca ah a zaan cu AKM inn ah kan riak. Cucu AKM ti mi pa kan hmuh hmasa bik a si i kan hmuh donghnak zong a si fawn. Lampi ah tangka zeihmanh ken a hau lo, nan tangka a taang mi hi keimah sin ah ap ulaw keimah nih kan kuat hna lai, a ti ca ah RM 1000 nak tam cio kan ap. Tlaihkhih nan ton sual ahcun phone ka chawn ulaw kan tlanh dih hna lai, phan awk zeihmanh a um lai lo, a kan ti. Kan i thawh ah hin a kan thlah lo. Ramri kan phanh lai ah hin driver nih RM 100 nan ka pek lo ahcun an dongtu ding puaisa phone number kan pe hna lai lo a kan ti ca ah kan pek. Ramri kan phanh lai ah AKM nih cun phone a kan chawnh i atu nan tum nakding ah khan tum hlah uh! Palek an um ca ah rak lan uh, a kan ti ca ah minute 30 tluk kan lan. Asinain kan tumnak zawn bak ah palek an rak um i an kan tlaihcolh. An kan tlaih thawng cu AKM nih a theih ko nain a kan chanh duh lo ca ah cuka ah cun ni 14 chung thong kan tla.

Image may contain: 1 person, selfie, closeup and text
Thonginn in kan boss sin ah bawmhnak kan hal. Kan boss nih Malaysia um kan chungkharle sin ah thawng a kan thanhpiak. Kan chungle nih AKM cu an rak chawnh. “RM 1000 cio an tangka ka sin ah a um i RM 2000 cio vun chap than ulaw keimah bak nih ka vung chuah hna lai,” a ti. Tangka cu tlamtling tein an pek ko nain a kan tlanh duh fawn lo. Thongpi ah chiah ding in bia an kan ceih. Kei hi kan boss nih RM 2000 in a ka nawlpiak ca ah thongpi ah kalpi loin ka tlaknak thonginn ah an ka kirpi. Thong chung ka um lio ah hin AKM hi nupi a ngei. A nupi hi keimah ka nu i a tafa Cer Hnem Thluai a si. Kan sican ning kha thonginn chung in facebook ah ka tial. Cun, AKM cu phone ka chawnh i na kan tuahto ning a fak tuk, hi bantuk hin mi dang sin ah vun tuah ti hlah,” tiah tah bu in ka ti. Cucu Cer Hnem Thluai nih, “Na kan tuahto ning hi rak i zoh. Naa theih le theih lo, ahodah aa cei deuh te lai ti cu kan zoh te lai,” tiah phone in a ka hro. Pathian lamhruainak thawng in 2018 May 8 ah Malaysia ram Ambassador nih an rak kan laak i a zaanlei 8:00 tluk ah Yangon ka phan i May 10 ah Thantlang ka phan.

Image may contain: 2 people, people sitting and indoor
Hi Aung Kyaw Myint ti mi pa hi cu hlan ah ka hngalh mi zong a si lo. Malaysia in kan tlun lai ah kan hawipa nih a kan chimhpiaknak lawng in ka hngalh mi a si. Asinain, nupi a thitnak puai i an tial mi ahcun Lian Bawi tiin a min aa tial. Thantlang ka phanh hnu ah kan hlat than tik ah cun Peng Za Lian ti a si fawn. Tisen khuami Pu Ngun Su (tleicia) le Pi Dawt Meng hna i an fapa a si, an ti. Sharon Par ti mi min in ka sining loin mualphohnak catialtu hi midang a si hrimhrim lai lo. Aung Kyaw Myint @ Lian Bawi @ Peng Za Lian tiin min a ngei i a kan dehhlengtu mihrokhrawl pa hi a si ko. A ruang cu thonginn ka um lio ah, “Naa theih le theih lo, ahodah aa cei deuh lai, kan zoh te lai cu,” tiah a rak ka hro cang ca ah hihi a rak i timhcia mi a si ko.
Hi pa hi a nuhrinnak ah Peng Za Lian aa ti i hrokhrawl dehhlennak le ningcang loin tangka kawlhawlnak ca ah Kawl min Aung Kyaw Myint a hman. Chungkhar nupi ngeihnak ah Lian Bawi in aa leet i mi mualphohnak le thangchiatnak ca ah Sharon Par tiin a hman. Hi bantuk in minung pakhat nih min pali tiang hmang in khua a sa ngam mi hi cu tihnung le fihnung cu an rak si hrimhrim ko ti a fiang.
Cucaah, Aung Kyaw Myint @ Lian Bawi @ Peng Za Lian @ Sharon Par, kan ngeihchun dihlak tangka na kan hlen hnu ah palik na kan tlaihter i thong ah na kan thlak fawn. Cu lawng cu na di a riam rih lo i ka sining loin mualphoh na ka timh fawn. Hi kong ah kan chungkhar le kan cingla dihlak kan thin a hung dih. Na thil tuah mi kong ah kan lungtlin nakding tiang in ngaihthiam na kan hal awk a si. Cuti i ngaihthiam na kan hal lo a si ahcun လူကုန္ကူးမႈ၊ လီမ္လည္မႈ၊ အသေရဖ်က္မႈ in အမ်ုူိိးသမီးေရးရာ ah kan report lai.
Sui Hlawn Par
Thantlang
Note: Hi kong he pehtlai in tam deuh hngalh a duh mi nih hal khawh ka si.
Ph: 09-899 607 985
Facebook: Champion Sui

Biakilh: “Fianternak” le “Zapi aw” hna hi The Hakha Post dirhmun a si lo.

Credit: The Hakha Post Zapi Aw

Note: The Hakha Post nawl hal hmasa hnu ah CCN Web. ah kan chiahmi a si. Chiah ve nan duh ahcun Tha Hakha Post nawl ngeitu sin ah nan hal hmasa hnu lawng ah nan chiah nak lai kan nawl hna.

LEAVE A REPLY

Please enter your comment!
Please enter your name here