Tuanvo latu nih Design an i palh ruang ah Timit nih peknak cu 2019 kum thok hrawng ceo ah kan dih kho lai

Chinramkulh chung Hakha dinti peknak an ser cuahmah mi Timit ti dawpnak caah Hakha khuachung ti peknak ah tuanvo latu hna nih design an i palh ruangah 2019 kum hramthok hrawng lawng ah aa lim kho lai tiah Municipal Minister U Soe Htet sin in kan theih.

No automatic alt text available.
Photo: Lian Hakha 2015 November 28

Hakha Timit ti dawpnak rian cu Timit tidil in Hakha khua chung tiang cu a phan kho cang. Hakha khuachung ti phawtzamhnak tuanvo cu Company 2 nih an i tlaih nain Company pakhat cu anmah pumpak rian ruangah an tuan kho. Cucaah KMDL Company lawng nih pehtlai in an tuan. KMDL Co., Ltd. nih Design ttha te in an tuah lo caah felfai deuh in kan check ter lio hna.

No automatic alt text available.
Photo: Lian Hakha 2015 November 28

An suaimi Design hi vawlei ah an duhpaoh in an tuah hnu ah a hnu in an suaimi design a si. Cucaah vawlei i a tak tuahmi le design an suaimi he aa khatmaw khat lo timi ttha ten kan zoh fel lio. An chimnak ahcun tu hnu thlahnih thum ahcun kan dih lai tiah an chim. Anmah lei he kanmah lei he tha ten tuah tuan ahcun 2019 kum hramthok ahcun aa lim ko lai tiah Chinram Municipal Minister U Soe Htet nih a chim.

Image may contain: 5 people
Photo: Lian Hakha 2015 November 28

Timit ti cawinak rian, Hakha khuachung ti peknak rian an tuannak ah Company pahnih nih tuanvo an lak nain atu ahcun KMDL Company pakhat lawng nih tuanvo an lak caah tangka lei chambaunak tete a um i Pyitaungsuh Hlutdaw ah rang tein rian an tuankhawhnak hnga caah an hal cang tiah kan theih.

No automatic alt text available.
Photo: Lian Hakha 2015 November 28

Hakha dinti peknak rian a nuarh tuknak kong he pehtlai in Hakha khuasa Salai Thangpi nih “A cozah zong nih heh tiah ti peknak rian hi an tuan cuahmah ko tiah kan theih. Nain nihin ni tiang ti kan hmu kho rih lo. Tuanvo latu Company le Cozah lei zong nih rianttuan ningcang cu a um lai caah a dikthlir cun ka theih lo. A sinain keimah ka ruahnak ahcun mipi ca i an ttuan ahcun mipi nih hmankhawhmi a si tiang, a dih cikcek tiang cozah nih rang ten an kan tuanpiak hna seh law ka duh” tiah a chim.

No automatic alt text available.
Photo: Lian Hakha 2015 November 28

Hakha Timit dinti laknak hi 2014 – 2015 tangka kum ah MMK 8.8 Billions in tuan hram an rak thok cangmi a si i Timit tidilnak, Timit tidil in Hakha khuachung ti khonnak tiang ti phan lak in an tuan khawh cang ko nain Hakha khuachung ti peknak rian an tuannak balte ah an i rauh tuk caah nihin ni tiang an lim khawh lonak a si tiah kan theih.

Salai Benezer

Credit: Chin World Face Book Page Kawlca in original rel khawh a si.

LEAVE A REPLY

Please enter your comment!
Please enter your name here