Chuncung khua ah Zu Ks, 2,400,000.00 man an thlet

==================

Halkha Peng Chuncung khua ah Chuncung khuabawi le Mino bu i bawm i July 17, 2018 in Zu zuar mi chekhlat le tlaih hram an thawk i July 22 tiangah minung 4 sin in an tlaih mi hna Zu ting24 man cu khua Mino bu nih Rualtlei lung pangah an thlet dih hna tiah theih a si. Chuncung khuabawi le Mino i bawm in Chuncung khua ah zeibantuk Zu hmanh zuar kham a si.

Hi kong he pehtlai in Chuncung Khuabawi Pu Lai Hit nih A tanglei bantuk in Chuncung khua i Zu zuar kong ah an biachah nak kong le hmailei kong ah a chim.

“Khuabawi tampi kan i thleng, khuabawi a tuanmi paoh nih Chuncung khua ah zu zuar hi khap a si lengmang ko nain biatak in rian hma a kal kho lo. Atu keimah ka tuan hin khuapi ten meeting voi tamnawn ka auh hna hnu ah biatak ten Zu zuar hi i khap seh tiah zapi nih hna tlak cio a si. Cun Ralrinnak zong pek hmasa i cu hnu i an zuar rih ko ahcun Zu zuar innkhat ah Kyat 100,000 in liamter siseh tiah biachahnak khuapi hna lungtling tein kan tuah. Cu hnu zong i an duh rih lo ahcun Cunglei tiang zong phak pi te ding in biakhiahnak kan ngei. (Meeting ah sau taktak hi Zu zuarnak kong hi kan ceih tiah bia a peh rih)

Khuapi biachahnak bantuk in Chuncung khua ah Zu a zuar tiah kan theihmi hna cu khuabawi zung ah kan auh hna i ralrinnak kan pek hna hnu ah zuar ti lo ding in minthutnak zong an ngei. A sinain Chuncung khua ah Zu cu duhtawk in an zuar tthiamtthiam rih. Cucaah Khuapi tampi nih nan kan tawlrel piak zokzok lo ahcun kan mino an rawk chin dih lai an ti caah phu hnih (1. Khuabawi 1 le innhra uk 2, 2. Innza uk 2 le inn hra uk 1) ah i tthen in July 17, 2018 ni thok in zu a zuar tawnmi hna inn ah kan va luh hnawh hna i inn 4 ah zuu cu kan tlaih hna. An inn chung kan luh cu langhngan in Zu cu an innchung ah an rak chiah mi kan hmuh tik ah kan ngaih a chia ngai. Kan biachah cia bang in an Zu kan hmuh mi vialte cu kan lak dih hnu ah innkhat ah Kyat 100,000/- cio kan liam ter hna. Kan chuhmi hna chung hin Inn 2 ahcun OP (OB tiah theihmi) tam nawn kan tlaih i Inn 2 ahcun Myanmar Rum ti bantuk cozah sermi an si hna. Zu hi Hakha in an rak ratpi mi a si lai tiah kan ruah. Kan tlaihmi hna hi a man zeizat a si ti cu kan fiang kho lo nain tlaih a tongmi chungkhar nih sing 24 (2,400,000/-) man a si tiah (Zu man kan theih ve lo caah tuak awk kan i fiang ve lo tiah a chim) an chim. Cun kan chuhmi hna Zuu hi Chuncung in Hakha lei ratnak chengpalang ah kan thlet, kan hlonh. Mah kan hlonhnak hi Hmunthur thletnak ah kan rak ti mi a si i palang kuai hna kha a hnu zong ah minung caah hna a hnok lai lo tiah kan ruah.

Hakha in an din tawk an i phorh i an din ahcun zeitin hmanh in i thlauh awk kan tthat lo bantuk in thlauh awk zong ah kan ruat lo. Nain Kan hmun cia ah duh tawk in an zuar tik ah, zuzuar mi zong zei rian hmanh ttuan zuam ti lo in zu zuar in tangka hmuh rumro an i tim, kan mino hna zong an hmuh khawhmi hnihkhat cu zudin nak ah an hman dih tik ah khua minung nun hrimhrim a hrawk tuk tiah ka ruah caah khuabawi ka tuan chung cu Chuncung khuachung ah Zu zuar hi cu ka si khawhtawk ka doh peng ko lai tiah a chim chap.

A tang ahhin Zu an thlet lio Muicawl tawi a um.

 

LEAVE A REPLY

Please enter your comment!
Please enter your name here