Hakha le Zokhua Kar ah Thilphor Motor Aa let.

Pakhukkhu in Hakha lei ah a rami thilphor Motor ngan cu Zokhua lonh Hakha in Meng (19) tluk ah Lamthlang ah a tla (an tlaknak hi a hmumi nih pe 100 in 200 tluk a chennak ah a si an ti) Motor ngeitu hi Pakhukkhu khuami a si an ti.

A nungmi Ambulance cung ah an khin lio (Photo: IPRD)

A hmun ah minung pakhat a thi i minung pahnih hliamhma an ing. A thimi hi Kyaw Zin Oo a si. Aa khawngmi ah U Naing Way Oo (40, Pakhukkhu, Motor khaaltu) le Myo Zay Yar Oo (23, Pakhukkhu, Motor Khaalbawm) hna an si. Aa khawngmi hna hi an hma a fak pah. Hakha Sizung pi ah an thop cuahmah lio hna a si.

A thimi pa Kyaw Yin Oo (Photo: IPRD)

Mah Motor hi Pakhukkhu khua in kan hnu zarh cacawn nihnih ni tluk khan Hakha lei ah kai an i thawh. An Motor a ciankuan lo caah zarhkhat leng lamcung ah caan an hmang. Atu tan an tlaknak a ruang hi theih a si lo nain Motor Hmailei kee a kuai caah a si men lai tiah Hakha Motor PK pa nih a chim.

Motor a tlaknak (Photo: IPRD)

An phorhmi thil hi Hakha NT3 Company (Nuamnuam nu laithil dawr tiah theih ngaimi) thil a si. Dawrhlun Dinti khonnak le peknak rian caah thil an cahmi hi a si. An phorhmi ah, Mirang Vawlei tun 220, Pipe 2″~ 3″ PVC Pipe thluan 130, thirhluan Ton 3 le Pipe pehnak a phunphun an i tel. Hi thil vialte hi lak tthan awk an ttha ti lai maw ttha ti lai lo ti hi theih khawh a si dih rih lo. Mirang vawlei hi cu a rawk pah dih khomen tiah an chim.

Motor a tlaknak… (Photo: IPRD)

Motor Vanchiat a tonnak ah Hakha in Meithat pawl nih Cozah Ambulance in an kal hnawh hna. Zokhua mino tampi nih an rak chuah hnawh hna i an bawmh hna tiah thawng kan theih.

Hmunhma a chiat tuk caah A nungmi Motor lam ah an chuah pi lio (Photo: IPRD)

A nung mi hna cu tuan ah Hakha ah an tlunpi khawh hna nain a thimi hi tuan ah a ruak lak a har deuh caah a si rua a hnu deuh ah HOPE Blood Donor Organization (Hakha) nih an va lak (HBDO an kal lio ahhin aa khawngmi zong phorh chih ding in thawng an theih sin in an kal ko nain a hmun an phak ahcun a nungmi cu an rak kal pi cang hna).

HOPE Blood Donor Organization (Hakha) Mizaw, Mithi Phorhnak Motor (Photo: CBL)

HOPE Blood Donor Organization (Hakha) Founder Pu Cung Hu nih, “Cozah zung rian ttuantu pakhat nih thawng a ka thanh i Motor pathum (Ruak phorhnak Motor 1 le aa khawngmi phorh an herh sual ah tiah motor dang 2) in kan kal hnawh colh hna.

HOPE Blood Donor Organization(Hakha) nih Miruak an phakpi kaa (Photo: CBL)

A hmun kan phak ahcun A nungmi hna le Meithat pawl cu an rak um ti lo i a thimi tucu Zokhuami nih an rak hngah.

HOPE Blood Donor Organization(Hakha) nih Miruak an phakpi kaa (Photo: CBL)
HOPE Blood Donor Organization(Hakha) nih Miruak an phakpi kaa Motor chung in ruak chuahpi hlan (Photo: CBL)

Zokhua khuami nih ruak Motor cung chuan le a herhmi an kan bawmh hnu ah kan rak i thawh. Hakha cu zan Suimilam 8:45 pm ah kan phan” tiah a chim.

Mithi chiahnak i luhpi lio (Photo: Iangku)

A thimi le aa khawngmi kong ah Pakhukkhu khua in Motor ngeitu le a dangdang minung (10) tluk Hakha ah an rak kai lio tiah thawng kan theih. Anmah an phak hnu in zeitin dah ruak i fimtawl a si te lai ti cu aa fiang te lai.

Angki sen (Senior Nurse) le a pawng HCVG Pastor Saya Aa Hnin, Mahbantuk in mitampi nih kan tonghngam lomi cungah dawtnak ngei tak in nan cawlcanghnak hi kan in upat tuk hna.

Thihloh a tongmi, aa khawngdengmi, Motor rawhralh a tongmi le thilri vialte zaw a tlami hna cungah CCN nih kan ngaihchiat pi hna.

(Betchap: Mithi chungkhat Hakha an phak lai ah Phone chung in Hakha nih kan ruak kan fim lawlaw ko u law tiah an chimh hna caah Hakha No 1 thlanhmun <Rual U thlan hmun> ah fimtawl a si lai)

LEAVE A REPLY

Please enter your comment!
Please enter your name here