Khrihfa Bu Kipfonh Pumpululh Chuih Zuamnak Ah HBA An I Tel Lonak A Ruang

Chin cozah, Zaangleknak zung lei thithruainak in Hakha um Khrihfabu kip mino pakhat le pakhat an i theih thiam i an i ngamhtlak hna seh law ti ruahchannak he 2017 kum thok in Pumpululh chuih zuamnak cu an tuahpiak hna. A voikhatnak a si bantuk in mino lungthin a lak ngai hna. Lente aa celh kho mi Khrihfabu kip in Team (21) an si. Pakhatnak ah Free Methodish, Pahnihnak ah Zion Baptist Church tiah teinak zong an hmuh.

Tukum 2018 zong ah a voi (2) nak kan tuah lai ti a si tikah nikum bantuk si lo in HBA (Baptist) mino hna cu i tel lo ding an si tiah thawng kan theih. Hakha khuachung ah HBA tang i a ummi Khrihfabu dihlak (khuate lei chim lo in) 15 an si. Cun Hakha khuachung ah milu zong a tambik an si. Nain tutan ahhin an i tel kho lai lo. Zei ruang ahdah an i tel khawh lo ti cu a tanglei Video Interview ahhin tlamtling te rel khawh a si.

Lente celh zuam, mino hruaitu cheukhat nih “cung lei in anmah nawl in kan i tel lai lo tiah kan hruaitu nih an kan ti tikah kan duhnak chimnak nawl zong kan ngei lo, kan lung a fak ngai” tiah a chimmi zong an um. Lente celh zuam mino cheukhat nih, HBA min si lo in Baptist min ti zong si lo in, phu khat in kan chuak ko lai tiah Zaanglek nak zung pengkulh bawi Salai Jacob sin ah nawl a hal zong an um tiah kan theih. Nain a phunglam kal ning a si lo caah onh an si lo.

Tukum cu Hakha pawng lam naih, Chuncung, Hniarlawn le Loklung zong sawm chih an si nain Loklung cu HBA biakhiah mi ruang ah an ttul i tukum aa zuamding mi cu Team 15 an si.

A tangah tlamtling deuh in ngaih khawh a si.

 

  1. Hakha ah Bukip fonh Pastor te i hawikomhnak cu an ngei nak a sau ngai cang nain Khrihfabu kip i hawikomhnak, Mino hna i hawikomhnak cu an tuah kho bal lo. HBA Mino nih kum 3 dan ah voikhat HBA Member lawng lentecelhnak an ngei. Living Church (HBA chungtel a si lo mi) nih kumkhat voikhat lentecelh zuamnak in i hawikonhnak an ngei. Bukip fonh i tuah tu taktak cu Cozah nih an si i cu hmanh cu a tu ning cun Kan cozah nih an kan pehzulh piak kho duh theng ti hnga maw? Tukum hna i a donghnak bik a si sual hnga maw???
  2. Cozah nih a voi 1 nak an rak tuahpiak hna lio zong ah Vomthumawng Celhtual (Ramkulh cozah ta) a rawk tuk suallai tiah Kio Mang Celhtual (Pengkulh Cozah ta) ah caan zeimaw zat cu an celh ter hna. Atu lio Ramkulh bawi hi Karen miphun Khrihfa mi a si.

 

Photo: Salai Jacob

LEAVE A REPLY

Please enter your comment!
Please enter your name here