March 1, 2018| Dallas

Sihne pawl nih USCIS interview ah kal le kal lo ding an chim
Salai Z T Lian

Feb 20, 2018 hnu hrawng in minung zeimawzat interview auhnak ah an zulh dih hnu ah Immigration sihne phu EMBARC nih a chim mi cu “Biakam bu in interview tuahmi a si caah mah interview auhnak kal lo ding in ruahnak kan in pek hna. A ruang cu atu bia an in halmi le refugee na rak sok lio ta kha an zoh ti than lai caah idannak tete siloah ikhah ti lonak tete hna a um sual ahcun hrokhrawl le thil hman lo na chim tiin tazacuai khawh na si caah a si. Interview auh a tongmi hna nih Freedom of Information Act form phit cio ding in thawng kan in thanh hna” tiin thawng an thanh. An nih sihne phu hi Kawlram ralzaam he a neih tein riantuanmi an si i, Des Moines khua ah hram a bunhmi an si.
A cunglei EMBARC sihnee phu ruahnak lawng i char i, mah kong ca tial cu a si kho deuh lo caah Dallas area in Immigration sihne pakhat hmuhning zong Becky Nelson sin in a chimhmi a um. A min langhter nak nawl ka hal lo caah ka langhter kho lai lo. A mah zong hi minung zeimawzat a zulh hnu ah a ruahning a chim ve mi cu “Nangmah taktak na si ko, na case hna tling tein le tha tein na theih rih ko ahcun kal ah a tha. Nain na case hna na thei ti tuk lo, siloah ka vaivuan lai tiin na ruah ahcun kal lo ah a tha deuh” tiin an chim.
Acunglei sihne pawl chimmi le ruahnak hi tha tein khuaruah awk cu a si ve.

Mah le mah biahalnak tuah awk a um khomi cu: Cakei na si taktak ti le si lo hmanh i fian lem loin kha biadik biahman ka chim lai tiin upadi hmai ah biakamnak tuah in cakei vai ti cu a tha na ti dek maw? Siloah cakei ka si taktak le si lo ka fian lo caah va chuah lo in ramtang ah dai tein um ko ning na ti lai maw? Siloah ka sining taktak ka va chim ko la na ti lai dah?
Thawngpang thanh cu a si khawh tawk in kan tuah lai. Chim duhnak cu thawngpang cu kan tial ko lai, kan chim ko lai, nain nangmah nih biakhiak te ko. A dihnak ahcun zeizong vialte hi interview auh a tonmi pumpak cungah a um ko

Ref: http://www.embarciowa.org/, Becky Nelson phone call

Editor note: Hi ca cu catial tu dirhmun a si. Hi ca hi CCN nih kan careltu ruahnak cheuhnak ca siloin, theih ve dingah kan van tar chin mi a si.

LEAVE A REPLY

Please enter your comment!
Please enter your name here