Dallas | Kum 70 nak Chin Miphun Ni (Dallas) catial zuamnak ah Biazai tial in pahnihnak laksawng a co tu Lian Chawn biazai kan in hrawmh hna.

——————————————–+——————————————————–

A Ttap Mi Semmawng Sin Biacah

Lungkuai thlalau phannak he
a ttap riangmang semmawng te,
Na nun temtuar harsat zia
zeitin kan hlawm hnemh khawh hnga?

Zaangfah dawtnak hri chat in
hakkauh khumhri i awh in
Tuksapur vawlei nun ro
a ruang kan chim thiam ri lo.

Khirh awk bel na ttha ti lo
na lamh vawlei duhnung lo
Harnak vawlei na phan cang
hrengkhenh hmun ah na chuak cang.

Hruhnak nih a tuamzual mi,
dawtnak khua a dei lo mi,
Muihnak a kiang lo vawlei,
damtertu ah hrin na si.

Tefa ca ah kan roh mi,
kan rawk vawlei rochia hi,
Nangmah nih na ser tthan lai,
na lohma rian khinh a si.

Kuanfang thisen in ciah mi,
hmailei caan na hruai cang lai
a dai ai dawh mi hmailei
a thlengtu ah hrin na si.

Dawtnak ah hram a sih mi,
ruannak a put mi cerhti,
ceunak a tlang mi vawlei,
ser tthan ding ah hrin na si.

These rawn na parter lai,
Na ser remdai vawlei hi,
ruahchannak he kan hngah mi,
na siang cung ttuanvo a si.

Lian Chawn (Thangtlang/Bungkhua)

LEAVE A REPLY

Please enter your comment!
Please enter your name here