Dallas – CYO Dallas catial zuamnak ah Capar in pahnih nak a ngah tu Tha Len Par capar kan van tar.


Chin mino tthancho dawnkhan tu le teinak lam

Biahmaitthi
Vawleicung minthang le caṭial thiam nih mino an hmuh hna ning an chim cio tikah
miphun pakhat dirkamhtu le ṭhanchotertu ahhin mino nakin thil a ti kho deuhmi an um lo tiah biatlang an kawm cio, Aolf Hitler nihcun “mino tampi a ngeimi lawng nih hmailei ah teinak an hmuh lai” a ti, Herbert Loover nihcun “Upa nih ral an thanh i a dotu cu mino an si” ati ve. Cu mino cu ṭhang cuahmahmi kan si, miphun i a hmailei ruahchannak, miphun a dirkamhtu le a ṭhanchotertu ding kan si caah mino nih kan hngalhding cu mah ṭhancho hmasa loin miphun ṭhanchoter khawh a si lo, kan miphun ṭhanchoter kan duh ahcun kanmah kan ṭhancho hmasa a herh ti hi a si. Cucaah ram le miphun dirkamhtu ding le a ṭhanchotertu ding mino nih ṭhanchonak dawnkhantu le cu dawnkhantu cu zeitindah kan tei lai timi kan hngalh a biapituk.

Mino tthanchonak Dawnkhantu
A ṭhang liomi mino kan si bantuk in hmailei kanṭhanchonak lamthluan ah dawnkhantu
thil tampi a um, cu dawnkhantu thil pawl cu kan theih a hau, dawnkhantu thil kan theih lo ahcun kan theih lomi cu a tei zia zong kan thiam lai loh, cucaah mino a simi nih zei hi dah ka ṭhanchonak a ka dawnkhantu a si ti kan hngalh dih hmasa a hau. Cu mino ṭhanchonak pawl cu caṭialtu hmuh khawh tawk kan zoh hmanh lai.
Mino kan si chungah mino hawi sin le a bu cawlcanghnak, miphun le khuatlang huap in
cawlcanghnak i kan i pelpom lo ahcun khuaruah ning a bi, hmuhtonmi le theihhngalhmi a tlawm lengah hawi nunnek kan theih lo i cucu mino pakhat caah ṭhanchonak dawntu ngai a si. Social medias, facebook, snapchat, instagram etc hna hi a hmanzia kan thiam lo ahcun hawi sin in a kan peutertu ah an i chuah ṭheu caah hi hna pawl zong hi ṭhanchonak petu nakin dawnkhantu ah an I chuah caan a um ṭheu. Minung pakhat a ṭhanchonak ah thathut hi dawntu thil nganpi a si, mino pakhat i kan hmailei a hrawh khawh. Minung kan nunnak ah kan ruahnak le lungput hi a biapi cemmi a si, a ho dah kan si timi le kan chunglei sining taktak a langhtertu hi kan lungput le nunzia hi an si ṭheu, cucaah ruahnak ṭhalo le lungput chia, uahfaih, minek, mahnak upadeuh upat lo, nu le pa ṭihzah lo, miphun thleidannak lungput, pengtlang ṭanhtuknak lungthin a ngeimi mino cu a ṭhangcho bal lai lo. Mah kong le sining i hmuh lo i mi kong ceih le mi soi te hna hi ṭhanchonak a dawn ngaingai.

Ziknawh ei duhnak lungthin le pum a hrawk khotu zukhmawn, chiaṭha thleidannak lungthin a hrawk khotu zudin te hna hi ṭhanchonak dawntu an si. Fimcawnnak le hawi ruahnak lak a duh lomi, chimh le cawnpiak aa nautetmi mino zeitik hmanh
ah ṭhangcho lai lo. Ṭhanchonak dawntu thil cu a tam lengluang ko sihmanhsehlaw hi vial hin kan ngawl lai i zei tin dah ṭhanchonak dawnkhantu thil hi kan tei lai timi lei ah i mer hna usih law.

Ṭhancho a duhmi mino pakhat nihcun tinhmi ngeih a biapi tuk, tinhmi fek le tleihrep kan ngeih ahcun cu nihcun teimaknak lungput le zuamnak lungthin a kan ngeihter caah thathutnak te hna a tei khawh. Ṭhanchonak dawnkhantu teinak dingah fimcawn duhnak lungthin ngeih a biapi tuk, mino si ko nain sianginn kainak caan rem le sining nih a tlinh ti lomi caah vocational training le cawnpiaknak kip, vawlei lei he biaknak lei he kai i ngaih lengmang a herh hringhran cu hna nihcun kan lungput ṭhalo le ṭhanchonak i a kan dawnkhantu nunzia ṭhalo vialte teinak a kan bawmh lai.

Caan le Rian a upatmi mino si a herh, zeibantuk rian a ṭuanmi kan si hmanh ah lung
si te le nuam tein kan ṭuan khawh ahcun a ṭhangchomi mino kan si ko lai. Rian a ṭuanmi lawng si loin rian a ser khotu (Job creator/business owner) si i zuam a herh. Mino pakhat a simi nih ṭhanchonak dawnkhantu thil kan tei khawhnak dingah ah caan le sining zulh tein nun thiam a biapi tuk, nifatin kan nunnak i kan tuah ding rianṭuan caan (daily routine) te i ṭial in kan i ṭialmi caan te zulh in cawlcanghnak nih mi a mersan, cu nihcun social networks nih a kan lem tukmi zong a kan teiter.

Nawlngaihnak kan timi hi ṭhanchonak ah lam hmasa bik a si, hruaitu, nu le pa
le uktu hna nawl ngai tein kan um ahcun kan ṭhancho ko lai. Mino pakhat nih hruaitu ṭha si I zuamnak in zultu ṭha si kan i zuam ding a biapi tuk. Zultu ṭha sinak nih ṭhanchonak a chuahpi cu zultu ṭha sinak nih a chuahpimi ṭhanchonak nihcun hruaitu ṭha ah a phakter ṭheu.

Biatlangkawm
A dongnak ah kan bible Phungthluk bia in kan hmuhmi cu “miphun a lianngantertu cu
dinnak a si ti a si. Pathian ṭih cu fimnak hramthoknak a si ti a si rih (Phungthlukbia 14: 34; 9:10)” Cucaah Chin mino nih Pathian kan ṭih ahcun kan fim lai, kan fim ahcun kan ṭhangcho lai, dinnak kan ṭanh ahcun miphun kan liannganter lai, miphun liannganter timi cu kanmah kan ṭhancho kha a si ko, ṭhancho hnu lawngah miphun caah ṭhatnak le ṭhanchonak chuahpi khawh a si. Dinnak a ṭanhmi le Pathian a ṭihmi si hna usih, eihmuarnak le ziknawh a dohmi si hna usih. Kurt Cobain nih a chimmi ka uar ngaimi cu “Mino hna i kan rian cu eihmuarnak zuamcawh le doh hi a si” a ti. Cucaah kan miphun chung i a ummi eihmuarnak le zikhnawh vialte a dohtu ding hi mino kan si. Cu doh khawhnak dingah cun kanmah mino pumpak cio kan ṭhancho hmasa a herh, cu ṭhanchonak ding ahcun ṭhanchonak dawnkhantu thil a cunglei kan hmuhmi khi kan tei hmasa dih hna a hau. Cu hnu lawngah mino kan ṭhangcho lai, kan miphun kan humhak khawh lai, kan ram kan ṭhanchoter khawh lai.

LEAVE A REPLY

Please enter your comment!
Please enter your name here