Dallas – CYO Dallas nih tuahmi catial zuamnak ah capar ah pakhat nak a ngah mi Ngun Tha Kim cabia kan van tar.

Chin mino tthancho dawnkhan tu le teinak lam

Hmun sang pipi kai ka ttih cu ka hngalh, asinain hmunsang um zei a lawh tu cu ka hngal lo.
Ngamh sang tak in thih ah thih, nun ah nun tiin pe 356’ a sang mi tung kaa cit hnu lawng ah hmunsang um zei a lawh kha ka hngalh fian. A tung par tiang kan kai leiah cun ttih phannak in ka khat, nain a dih dongh tiang kaa cit hnu i ka ttum cun teinak a hmumi bantuk in kaa uang. Cu he tahchunh in kan Chin mino tthancho nak a kan don bik tu cu kan ttihnak tiang lawng in kan I tinhmi kan donghter tawn caah a si. Sungh zatlak le hlawhtlin lo kan phannak nih tthanchonak ti-hna a kan dinter kho lo. Cu caah cun, pa raltha ti men lawng a zaa lo, pa tthawng ti men lawng a zaa lo. Kan tthanchonak dingah cun phak khawh lo lai kan ttihmi kan chunmang hna hi, teirial nun he raltha tein, teinak kan phak hlan tiang kan i zuam awk a si.
Chunmang ngei lo a hohmanh kan um lo, tinhmi le saduhthah kan ngei cio; nu hrin fa paohpaoh nih. Kan ngakchiat lio i kan khuaruahnak ahcun, cucu si te ning ti kan duh mi hna hi zakhat ah zakhat kan si kho lai ti zumhnak kan ngei. Nain kan kum a hung upat in kan zumhnak hna cu ti thawl a pem mi bang, an hung zor diahmah ttheu. Hihi zeiruangah a si? Zeiruang hmanh ah a si lo, kan i tinhmi cungah fek tein kan dir ngam lo caah asi.
Chin mino kan hung upat deuh in tinhmi huahaa ngeih lo kan hmang. Cun kan ngeih
khawhnak dingah kawl zong kan hmang fawn lo. Tinhmi kan ngeih lo tikah kan um a har, kan vai. Khuasual kan va pur i that lonak lam tu kan zul. Kan umhar nak nihhin, tuantuk nupi thit va ngeihnak hna hi an chuahpi. Mah hi pumpak tthanchonak a dawn ngaingai mi a si. Cu lengah, kum no tuk in innchungkhar kan dirh tikah kan hmuhton mi a tlawm. Cu nihcun a nuam lomi le a hlawhtling lomi innchungkhar a chuahpi tikah, hrinsor fale hna zong mi zeihuahaa loah an I chuah ve tthan. Hiti kan sinak a theipar nih hin tthanchonak he lam a kan hlatter chin.
Siangsang (highschool) a dih cang mi hna zong chunmang ngei lo bantuk in sianginn pehtthan kan i tim tawn lo. Mi hawi bantuk in sianghleiruun( college) kai hi kan ttih ttheu. A poi tuk! Caan tha kan ngeih lio ahhin, caan rem kawl i mifim cathiam chuah kan i tim ngam lo. Kan ral a chia tuk. Phaisa kan ngei lo kan ti, ca kan chei lai lo kan ti, rianttuan hau kan ti. Solhphelhnak phunphun kan hman. Hi solh phelh kan hmanmi hrimhrim nihhin tthanchonak a kan donh tuk. Phaisa cawi awk a um, kan cawi lai, kan kai lai, kan cham lai. Lai khal fa sining in USA ram hmanh ah siangsang kan kai khawh ahcun, sianghleiruun kai cu khuaruah har le ttih awk a um lo. Hi kaa khua kan sak khawhmi hi khuaruah harnak asi cang. Kan kai lai, kan cawn lai, cun kan thiam kho ve lai. Rian ttuan cu kan duh zong duh lo zongah ce-pa timi kha kan si. Kan thih hlan lo ttuan a hau te lai, cucaah thih hlan lo ttuan ding rian ttha kha caan kan ngeih lioah kan kawl hmasat phung a si. Ttuan pah, kai pah, degree lak, rrianttha ttuan. Mah tining hin tthanchonak a umnak sianginn kai hi kan i sehchih awk asi. Asi kho lo timi hi vawlei cungah a um lo. Nain kan mah nih hin si kan ngamh lo ruang tu ahhin, asi kho lo tiin kan chunmang, kan si duhmi hna cu hnu ah kan hnawl i lamdang kan pial taak. Hi ruangah hin hawinak in rianttha le
sinning tha kan phak khawh lonak asi.
Chin mi tampi cu lamthar a pem tu hmasa si hi kan duh lo. Mi tuah cia le hmuh cia lawng tuah ve phung le ti ve phung ah kan rel. Mah kan khuaruahnak ruang hrimhrim ahhin tthanchonak ding lam hi a bii khun kan caah. Siibawi, Pastor, ralkap bawi le inginiaring (engineering) ti pawl lawng hi si phungah kan rel. Cu hna pawl kan si khawh lo tikah tthanchonak lamdang kan hmu kho ti lo i kan ruahchannak a dong. A si kun, diziner(designer), sii sertu,thilri serchuah tu, maivan thiamsang tlaitu ti bantuk hna hi tah rian an si ve lo maw? Hi bantuk rianttha chin mino nih ttuan bal lomi tamtuk an um. Mah bantuk hna nihhin ruahchannak a kan pek lai. A ttuan hmasa bik si ttih hna hlah u sih. Kan duhmi le kan huam mi rian a si ahcun hmai hngal tein si khawh kan i zuam awk a si. Mi nih a kan doh zongah, hlawh tling ding hrimhrim in kan i zuam awk a si. Chin mino nih an ttuan theng lomi rian asi ko zongah, pumpak nangmah caah hlawhtlinnak an phakpi tu asi kho.Lamthar le thilthar chuah pi tu si cu miphun thanchonak lam sialpiak tu kan si.
Ttihmi ngeih cu atha, hna var tein a kan um tertu asi. Harsatnak ton zong a tha, kan lung a har tertu asi. Kan tuanbia cinken cu a tha, thazaang a kan pe tu an si. Cun lam thar a pemh hmasa biktu si zong a tha, mi dang caah lam sialpiak tu kan si. Cu ruangah Chin mino hna, hna var tein kan hna tung usih. Lunghar tein hlawhtlinnak kan hmuhnak lamthluan harnak vialte hi raltha tein kan tei khawhnak hnga, Chin mino kan sinak kha thazaang i laak in kan saduhthah pemh hna usih. Cu teinak nih cun, chin mino vialte le kan miphun tthanchonak lam leiah a kan hruai lai.

LEAVE A REPLY

Please enter your comment!
Please enter your name here