Indianapolis, IN | Thawngthanh le Fianter nak

Dawtmi Lai hritlai u le nau hna,
North America Paih Committee nih Chin National Day hmang tti ding in kan in sawm hna. Kan hnu lei ah
kan rak thanh cang bantuk in, A voi 70nk Lai Phun Pi Ni ah North America Paih Committee nih Indianapolis ah tuah dingmi Lai pasal ttha hna “Ttang ttha zam le bual cung lam” zaang
cuainak kong ah, committee nih a hnunung bik meeting baichah kan hun in theihter tthan hna.
Paih ningcang:
– Aa pai mi min chim tikah Laitlang a chuahkehnak khua min chim chih asi cang lai. (Fianternak: A ruang cu kan paih hi vawlei kil li um Laimi nih zoh asi cang caah, aa paimi hna hi kan unau, kan fale an si ti hmanh hngalh a har ngai cang. Cu caah, Lai thlang an chuahkehnak khua min kan chim lawng ah thazaang pek awk le lawmh pi awk ah theih khawh an si).
– Paih dawh bik laksawng pek a si lai. $500 le trophy a si lai. (Paih dawh bik laksawng hi hngakchia te zong nih hmuh khawh a si).
– NAPC World champion asi liomi lawng zatlang paih ah hual asi lai. Midang paohpaoh zatlang ah i paih khawh a si. (Fianternak: Tu lio NAPC World Champion asi mi Rung Lian Ceu lawng zatlang paih ah aa pai lai lo. Zatlang paih ah bual a kir bal cang mi, Kap Tawng, Tial Cung Thang, Van Maung, Tin Lian Thawng ti bantuk pawl zatlang paih ah an i pai kho cang lai. Pa tthawng lungsi tein an i pai kho lai, pa tthawng paih diriam tein kan zoh kho lai).
– Zatlang paih cu chun 12:00 in zan 8:00 tiang bak a si lai. 8:00pm in zaumcawh paih thawk a si lai. (Zatlang ah aa pai cang mi zong zuamcawh ah i paih khawh a si lai caah, min pe hmasa mi chung in an tuanbia zoh in minung 16 thim i zuamcawh paihter an si lai).
– Club in paih a si lai. Club A, Club B, club C ti in club tampi a um lai. (Fianternak: Club A ah Zophei, club B ah Hniarlawn, club C ah Haha Khuathar ti bantuk in club cu ser (form) asi lai. Mi pikpak caah Committee nih club pakhat ser piak asi lai. Club cio nih coach “hruaitu” ngeih cio asi lai i, aa paitu ding cu coach lawng nih an chuahpi hna lai. Coach rak i thim cia cio ko u).
Tlangval pawl caah:
– CCI nih tuahmi “2017 Chin Got Talent” ah pakhatnak a hmutu nungak Khuaitizu nih ram hla a kan sak piak te lai. Nungak zai thiam Ngun Tha Dim nih a hun bawmh ve lai.
– 2017 Indiana CYO leeng dawh zuamnak ah miss a hmutu nungak Anna Dawt Tha Zing le samthlai rem leeng Deborah nih tthawn man laksawng an pek hna lai.

Fianternak:
Vawlei cung khuaza ram kip um Lai mipi nih lung fianlo ruangah hal lengmang mi chung in a tanglei bantuk in North America Paih Committee nih fianternak kan hun tuah:
Q 1. Zei caah dah kum khat chung ah paih voi thum tiangtiang nan tuah?
A 1. North America Paih Committee nih kum khat ah paih voi khat lawng kan tuah. Lai Phun Pi Ni conglawmhnak caah CCI he i kian in voi khat lawng kan tuah.
Q2. World Paih Championship le North America Paih Committee hi nan i khat maw? Minung aa khatmi nan lo ngai.
A 2. Kan i khat lo. A ttauntu minung zong kan i dang ko. North America Paih Committee ah caan sau pi a ttuan balmi hna kha World Championship ah an i tel caah minung aa khat mi kan lawhnak asi.
Q3. Zei ruang ahdah committee pa hnih cun nan um?
A3. North America Paih Committee cu Lai nunphung asi mi Lai Paih hi kilven ding le mino hna thiamter ding, zuamter ding, tthanchoter ding ah dirhmi asi. World Championship cu, Lai Paih in Lai pa tthawng hna nih pawcawmnak tiang a phak khawhnak ding ah lam a kawlmi an si.
Q4. North America Paih Committee le World Paih Championship hi pehtlaihnak nan ngei maw?
A4. Kan ngei lo. Voi khat cu ton kan in duh hna an kan ti nain kan i tong thaim lo. Tinhmi aa dan ko caah ton hmanh ah pehtlaihnak cu kan ngei kho lai lo.
Q5. Paih Committee pa hnih Indianapolis khua ah nan ummi hi CCI nih zeitindah an ruah?
A5. CCI nih zeitin an ruah cu kan hngal lo. Anmah hal hna ah a ttha hnga. Asi nain, kan nih North America Paih Committee cu CCI he rian a ttuan tti zungzal mi le, CCI nih dirkamhmi kan si zungzal ko. World Paih Championship le CCI an i pehtlaih ning cu kan hngal lo.
(Bia vaivuan a um sual nakhnga lo, kan chimmi tiang lawng hin kan chim chin piak cio ko u).
Feb 10, 2018 (Zarhte ni) ah kan i tong te hna lai.
Lunglawmhnak tampi he,
Kennedy Lalram Lian, Chairman
NAPC

NAPC hna CCN nih biahalnak kan ngeihnak hna video na zoh rih lo ahcun rak zoh ve.

LEAVE A REPLY

Please enter your comment!
Please enter your name here