Salai KB Thawng, The Hakha Post

Hakha khua cu Chin Ramkulh khualipi pakhat a si. Myanmar ram Ramthen le Ramkulh hna lak ah sifak bik kan si ko nain “khualipi” a si ve hi hngalh peng a herh. Khualipi lungput, khualipi nunning le khualipi muisam hi kan ken deuh i kan i ngeih mi sining pakhat zong a si awk a si.

Traffic-light (mipuanh) ti mi cu lamtonnak le lampial pawl (traffic-jam or junction point) ah ralrin petu meiceu chiah ti khi a si. Yangon khua hoi ahcun traffic-light lawng si loin Closed-circuit Television (CCTV) an tuah i lam tan ning palh sual, traffic-light lonh sual tibantuk zong ah CCTV nih a tlaih dih. Hakha khua ah cucu kan tuah kho rih lai lo nain ralrin petu meiceu a sen, a eng le a hring (red-yellow-green) tal cu Cozah nih a tuah hrimhrim cang awk a si.

Zeicahtiah, mino tampi cu Motor PK (Traffic Police) nih an chei ti hna lo. Rianrang taktak in motorcycle khalh kan uar tuk rih. Thang taktak in awnhter i mi vialte lau lengmang in rang taktak in khalh kha thiam le thawn ah a ruat mi kan tam tuk rih. Zurit bu in kan khalh i midang kan khawn hna pin ah a khaaltu ca hrimhrim ah tihnung tuk a si.

Kan hngalh cio bang Hakha khuachung cu lam a bi tuk. Mi sopaw pakhat nih a duhtawk in motorcycle a hun khalh ahcun thinphan dai lo a si. Motor pakhat lamkam a dir tik ah lam a pit ti awk in a um. Mah kalnak lam (lane-kyawng) in kal awk tha lo hna in a um tawn. Cu laklai ah lam tan a thiam lo mi tampi kan um ve rih hoi. Hakha cu khuapi chung um he, khuate in a rak tlawng mi, a rak peem mi he cawhhrup in kan um cang. Cucaah, kan him nakhnga traffic-light tuah cu a herh hrimhrim mi a si.

Hun chim ko ning, kan PK (traffic police) pawl hi a caan ahcun motorcycle luchin aa chinh lo mi chek le tlaih, driving license chek hrawnghrang lawng hi maw an rian a si hnga, hun ti awk in an um. Lam ah a umkal mi zohfel le tawlrelnak a tlawm tuk. Lamlai i a eng muici in riin mi zong an lo dih i khoika in lam tannak a si hmanh hngalh khawh a si tuk ti lo.

Cuti asiah, Traffic-light tuah cu aho rian dah a si kun? A fawinak in chim ahcun Chin Ramkulh Cozah rian a si ko. Lamsuul Zung nih maw, Sipin nih maw tuanvo an laak awk a si. Hihi tuah an timh lo cu a si lai lo nain rianrang deuh in an tuah awk a si. Tangka budget zong tampi a dih ding a si lo mi a si ko. Ramkulh Cozah pakhat nih fawi tein a tuah khawh mi a si ko.

LEAVE A REPLY

Please enter your comment!
Please enter your name here