Hakha (Hakha Post) – Hakha sii-inn ca ah siibawipi a herh i Nay Pyi Taw ah kan hal lio a si, atu hi Falam siibawipi caan karlak in Hakha sii-inn ah chiah a si, tiah Social Affairs Minister Pu Pau Lun Min Thang sin in November 8 ah thawng kan theih.

“Falam sii-inn ah siibawipi pahnih an um i caan karlak ca in pakhat cu Hakha sii-inn ah kan chiah. Hakha sii-inn ca ah a dang tein siibawipi Nay Pyi Taw ah kan hal lio a si i zeitik ah an kan pek lai cu a fiang rih lo. Siibawite zong aa thleng mi le a thar a ra mi tibantuk le sii-inn uk zong aa thleng i a thar a rak phan rih lo tibantuk a si ca ah mizapi nih a ruah zia kan thiam hram u. A tha bik in kan tawlrel cuahmah ko,” tiah Chin Ramkulh Cozah Social Affairs Minister Pu Pau Lun Min Thang nih The Hakha Post ah a chim.

“Kan hnuleite zong ah mi tampi cu Yangon khua ah siibawi riantuan khawhnak camipuai an va phi. Promotion a um ca ah Master a awng mi, Ph.D le Surgen tibantuk tiang in an phi i a phichuak belte hngalh khawh a si rih lo. Kanmah Chinram sii-inn ca ah kanmah Chinmi deuh nih siibawi hi hmu kho usih ti zong saduhthahnak kan ngei,” tiah a cunglei upa nih a chimchap.

 

 

LEAVE A REPLY

Please enter your comment!
Please enter your name here