Chin (Hakha Post) – Chin Ramkulh chung ah siangcachim minung 3806 an bau ca ah Chin Ramkulh Cozah nih Pyidaungsu Cozah sin ah an hal mi nihin tiang tlam a tling kho rih lo, tiah  Chin Ramkulh Cozah Social Affairs Minister Zung in November 8 ah thawng kan theih.

“Sianginn zong 221 a karh bantuk in siangcachim minung 3806 a herh ca ah Pyidaungsu Cozah ah kan hal. Budget he aa pehtlai mi a si tik ah nihin tiang tlam a tling kho rih lo. Chin Ramkulh chung ah siangsangruun cachimtu minung 420, sianglairuun cachimtu 1416 le siangniamruun cachimtu 1970 kan herh rih. Sianginn pakhat ah 1+5 ti mi sianguk le a bawmtu a um hrimhrim lai. Tahchunhnak ah Haiphai khua hna ahcun siangcachim 5 an um i siangakchia 3 lawng an um. Cucu a tha mi a si ko. Amah belte, siangakchia tam deuhnak ah sayate an tlawm tuk ahcun kan siamremh ko hna. Sianginn ah siangcachim chambau in kan um ti nakhnga lo atu bantuk in Pyidaungsu ah kan hal hi a si,” tiah Chin Ramkulh Cozah Social Affairs Minister Pu Pau Lun Min Thang nih The Hakha Post ah a chim.

2017-2018 cacawn kum Chin Ramkulh ah High School, Middle le Primary ti in Hakha Peng ah 10, Thantlang Peng ah 9, Falam Peng ah 15, Tonzaang ah 3, Tedim ah 27, Mindat ah 27, Matupi ah 10, Kanpetlet ah 29, Paletwa ah 92, a dihlak ah sianginn 221 a karh i private sianginn 7 zong aa chap. Saya/mate 1242 cu a caantling  siangcachim (vuanthan) ah cohlan a si, tiah kan theih

LEAVE A REPLY

Please enter your comment!
Please enter your name here