October 31, 2017|New York City– Tuzaan lei U.S. caan suimilam 3pm hrawngah  kum 29 a si mi Sayfullo Saipov nih mawtaw nganmi (Truck) in New York City lamkam ah ai chok mi le cycle ai cit mi hna a pah hna I minung 8 an nunnak a liam I minung 11 zato ah an chiah hna tiah nawlngeitu Police nih an chim.

Hi ti Truck in mi a pah hna nak hin siangngakchia cit mi mawtaw (Bus) a va suk. Mawtaw mawngtu pa cu a mawtaw in a chuak I a zaam nak ah Police nih an tlaih khawh. Meithal in an kah nain a nunnak a him I a tu hi Doctor te nih an zohkhenh ve. “A nunnak a liam rih lo caah hal kan duhmi le theih kan duhmi a kan chimh khawh lai caah, a nun buin Police nih an tlaih mi hi thil tha a si ko” tiah House Homeland Security Committee Chairman Michael McCaul nih a chim. “Ralhrang tuah ser nak a tuah kho mi an si tiah zumhmi 1000 leng a tu hi U.S ramkulh 50 chungah hlathlai nak kan ngeih lio hna a si” tiah McCaul nih a chimchap.

New York City khuabawi Bill de Blasio nih hi thil a cang mi cu “Ralhrang tuahsernak” tiah  thanh nak a tuah. Mawtaw mawngtu pa nih mawtaw in a zaam pah ah “Allahu Akbar” tiah a au tiah mithmu tu hna nih an chim. Nawl ngeitu hna nih “hi thil hi IS min in a tuah mi a si” tiah Truck chungah Ca tial ta mi an hmuh mi kong CNN ah an chim.

New York ramkulh bawi Andrew Cuomo nih, “ New York ramkulh hmunkip ah Police tam pi nan hmuh hna lai caah thinphang in um hlah uh. Himnak caah a vengtu an si. Thil tihnung a um caah a si lo. I ralrin nak ca ah a si” tiah New York mipi hna bia a cah hna.

Mawtaw mawngtu hi 2010 ah Uzbekistan ram in U.S ah a ra mi a si. Diversity Visa ti mi in U.S ah a rak phan mi a si. Diversity Visa cu U.S ah luhkhawhnak lam phun khat a si I awngbali zuh in a hmu mi paoh nih ngah khawh mi phun a si. Hi DV phung cu President Trump nih donghter a duh mi le a zuam cuahmah mi phung pa khat a si.

LEAVE A REPLY

Please enter your comment!
Please enter your name here