CHIN (Hakha Post) – Hakha le Zokhua kar October 30 zaan ah SKAT motor lamthlang ah aa let i motor ngeitu tel in an zapi minung pathum a hmun ah an nunnak a liam.

A thi mi hi Pu Mang Hnin kum 55, Pu Lian Za Uk kum 36 le Salai Chan Tin Thang kum 20 hna an si. An zapi in Bungzung khuami an si. Pu Mang Hnin hi motor ngeitu a si i Pu Hram Dun le Pi Sun Tlem fa a si. Pu Lian Za Uk hi Pu Ca Lian le Pi Tial Pen hna i an fapa a si. Salai Chan Tin Thang hi Pu Ceu Lian le Pi Sung Iang hna i an fapa a si.

“An tlaak ning hi aho hmanh nih fiang in theih a si lo. Anmah pathum lawng an si. Bungzung in zaanlei in an i thawh. An tlaaknak hi Zokhua in furlong pahnih hrawng ah a si. Zaan a si pin ah nikhua a chia i chum a chah tuk ca ah lam a fian lo ca ah a si kho, an pathum in a hmailei thutnak chung ah an thut ca ah a hmun i an thih colhnak hi si dawh a si. An tlaaknak hi lamthlang lei pe zahnih leng ah a si,” tiah Bungzung khua upa pakhat nih The Hakha Post ah a chim.

An ruak hi Hakha sii-inn ah an hun lanhpi hna i a phung ning in siibawi nih an zoh hna hnu ah khua lei ah an kirpi hna.

LEAVE A REPLY

Please enter your comment!
Please enter your name here