Hakha (Hakha Post)

Winner (Chin Idol) Esther Dawt Chin Sung:

“Hi hlasak ka rak i zuamka cun pakhatnak ka co hrimrhrim lai ti cun ka rak i ruahchan lo. Asinain, kaa zuamnak level kip ah ka thiamnak chuah in a tha bik in kaa zuam peng i zeizongte hi Pathian kut chung ah ka chiah dih. Ka tlinh ruang le ka thiam ruang ah a si hrimhrim lo. Pathian thawng in a si ko ca ah Pathian min ka thangthat. Cun, laksawng a ka petu Salai Lungtlitum cung zong ah kaa lawm tuk i ramchung ramleng in thazaang a ka petu mizapi dihlak cung ah kaa lawm i nan thapeknak thawng in hi dirhmun tiang ka dir khawhnak hi a si. Cun, level zuamnak kip ah Biakhiaktu (Judge) hna cung ah kaa lawm tuk,” tiah The Hakha Post ah a chim.

Esther hi kum 19 a si i Yangon ah Economic Major in University a kum thumnak a kai lio mi a si. A kai mi major in scholarship a hmu i Japan ram ah kum hnih peh than ding a si. Kum 4 a si in hlasak hram aa thawk cang i hlasak zuamnak tete ah pakhatnak zong a rak hmu lengmang mi a si. Kum hra a si lio ah Chin Ramkulh aiawh in Myanmar ram Su-Kah-Yi-Ti zuamnak ah pakhatnak a rak co bal. 2015-2016 kum ah Yangon khua Chin Ca le Nunphung Kilvennak Bu King le Queen thimnak ah Queen a hmu bal. Cu lawng si lo in 2015-2016 Hakha, HCUF King le Queen thimnak ah Queen a hmuh than i 2016-2017 kum a kainak University an major ah Queen ah Queen a voi thumnak thim a si rih. Pehtlaih a duh mi nih Esther Esther ti mi Facebook in pehtlaihnak tuah khawh a si.

1st Runner up & People Choice Award Tluang Za Lian:

“Teinak cotu si ding cu tampi kaa timh ngam lo nain ka thiamnak dihlak chuah in le a tha bik in kaa zuam lai ti mi ruahnak cu ka ngei. Cu bantuk cun level zuamnak kip ah a tha bik in kaa zuam i hi dirhmun tiang a ka phaktertu Pathian min kan thangthat. Cun, ka ca ah a sunglawi tuk mi mizapi uar bik mi laksawng ka hmuhnak zong hi mizapi nan thapeknak thawng in a si ca ah tha a ka petu nan dihlak cung ah kaa lawm tuk. Lawmhnak in ka khat ko, a ruang cu hi laksawng hi kaa ruahchan ngam lo mi a si ca ah a si. Hi kaa zuam chung ah ringawn lei in siseh a kapkip in a ka bawmchantu vialte cung ah kaa lawm,” tiah The Hakha Post ah a chim.

A Lian hi kum 23 a si i Kalay University ah Mathematic Major in kum thumnak a kai lio mi a si. Taanghra a dih hnu lawng in hlasak aa thawk mi a si. Chinmi chung in minote hlaphuahthiam zong a si i zunn hla le Pathian hla Kawl he Lai he hla a phuah mi a si. Nihin tiang ah hla fung 100 reng lo a phuah cang mi a si. Pehtlaih a duh mi nih Chin Mi Laipa Alian ti mi Facebook in pehtlaih khawh a si.

2nd Runner up Tha Kung Thang:

“Hi dirhmun tiang ka phak khawh nakhnga thla a ka campiaktu ka nu le ka pa le a ka dawtu dihlak cung ah kaa lawm tuk. Ramchung le ramleng in Like, Share le SMS in thazaang a ka petu dihlak cung zong ah kaa lawm tuk. Zuamnak level pakhat hnu pakhat ah biakhiahtu hna le Top Ten kai hnu tiang biakhiaktu hna cung ah kaa lawm tuk. Teinak hmuh ding hi cu kaa ruahchan ngam lo nain ka thiamnak dihlak chuah in kaa zuam ve i Pathian nih hi dirhmun tiang a ka phakter mi hi a si ko,” tiah The Hakha Post ah a chim.

Kkung hi The Hakha Post Zung ah Reporter le Hakhanet Local TV Channel ah rian a tuan cuahmah mi a si. 2016 kum ah Yangon, Believers Church Biblical Seminary (BCBS) ah B.Th degree a hmu cang mi a si. Salai M. Kkung tiin The Hakha Post le a dang ah ca a tial mi zong a si. Pehtlaih a duh mi nih Salai M. Kkung ti mi Facebook in pehtlaih khawh a si.

Chin Idol 2017 hlasak zuamnak ah minung 50 tluk an i zuam i cu chung ah minung pahra a tang mi hna cu; Biak Cin Thang, Biak Tha Lian, Biak Tin Hnem, Za Uk Bawi, Christ Lian, Mission Par Mawi, Esther Dawt Chin Sung, Siang Lian Tum, Tluang Za Lian le Tha Kung Thang hna an si. Cu chung ah Esther Dawt Chin Sung nih Chin Idol 2017 ti mi min cu a co.

 

 

 

LEAVE A REPLY

Please enter your comment!
Please enter your name here