Hakhanet – Hakhanet he biaruahnak caan na kan pek ca ah lunglawmhnak tampi kan ngei. Hakha ah na rak thang i taang riat tiang zong na rak cawng ti thawng kan theih. Hakha nan rak um lio le atu Hakha aa dannak, khuasak tintuk aa dannak, tlonlen ning aa dannak le a thancho ning tibantuk na hmuhning theih kan duh ko.

Sung Tin – Aa thleng tuk cang. Van le vawlei tluk in aa thleng ko. Atu chan ahcun Hakha hi a thangcho tuk cang i keimah hmanh ka mit aa let dih. Mithar zong an tam. Inn le lo zoh tikah motorcycle tibantuk a um dih. Motorcycle hi cu kalumnak ah phanat tluk in an hman cang. Hlan ah cun Chin-oo-sii sang kal tehna khi kan i fawih tuk. Ke tein lam hlaat pipi kan rak kal ko. Atu chan ahcun ke in kal ding cu ka tih ngai cang. Chan aa thlen bantuk in motor le motorcycle an tam tuk i vah ngam setsai a si lo. Hi vialte kum chung ah a thancho mi hi thancho ding zong a si ve ko. Hi nak hmanh hin thancho deuh ding a si.

Hakhanet – Tutan na rak tlun hi Chin Idol Judge tuan ruah ah a si tiah kan theih i Myanmar ram aiawh in Judge a tuan tawn mi pakhat mit in zoh ahcun tu tan Chin Idol hi chambaunak tampi a um rih ko lai. Hmailei Chin Idol tuahnak ding kong ah, zeitin tuah siseh law a tha lai tiah na ruah mi a um maw?

Sung Tin – Keimah pakhat chimnak lawng cun tlam a tling kho lai lo nain; Chin Idol tuahnak ah tlamtlin lo nak tete zong a um. A biapi cu a caan kong  zong a si. Kanmah cio zong nih a caan pe kho deuh hna u sih. Aa zuam mi ngakchia zong nih hinak in a caan pek deuh in timhtuahnak tha deuh in ngei hna seh law, hi nak cun a tha deuh hrimhrim lai. Aa zuam mi zong nih hla hi biatak tein ngaih a hau. Atu cu chanthar mino nih chance tampi an ngei. Chin Idol zong hi laksawng a tam ko. Laimi cu ram kip ah a um mi kan si, atu cu media zong an thawng i pakhatnak, pahnihnak cu chim lo Top-10 tiang a phan mi hna hmanh ram kip um Laimi nih theih dih an si. Hlan lio bantuk in a hla a minthan hnu le zapi hngalh hnu ah theih si lo in, atu cu media ah an langh poh ahcun minthan le mi theihhngalh mi si a fawi tuk cang. Asinain kan naule nih hin kan uu le bantuk in pehzulh taktak le duhnak taktak ngei in i zuam chin  hna seh ti hi ka duh mi a si.

Chin Idol hi hmailei ahcun hi nak kau deuh pi zong hin an tuah khawh te ko lai. Atu an tuah mi ah ramkip hmun kip in a soisel mi zong an um lai. Kei cu ka nuam ngai ko. Ziah ti ah cun, comment a tha mi zong a um, micheu nih cun kanmah zong an kan thah deng ko. Asinain Chin Idol hi a ho poh nih an rak zoh ti a fiang i kanmah an kan soisel zong ah khakha cu zei hmanh  poi lo. Chin Idol pi an rak tuah hi ta ti mi Laimi kip nih an rak theih mi kha a miak a si ko.

Hakhanet –Tutan Chin Idol tuahnak ah na lung a tlinnak te a um ah cun theih kan duh ko.

Sung Tin – Tu tan Chin Idol ah ka lungtlin ngai mi cu; Laimi cu kan ngakchia tein Sunday School a kai mi kan si. Hla le Khrihfa hi cu aa pehtlai mi kan si i Kkawl bantuk in a aw a lai  mi le a thiam lo taktak kan um lo. Hlasak tik zong ah aw lai zong i hngalh lo tibantuk khi cu Laimi nih kan lonh cia tuk a si i zei bantuk tha deuh in dah an sak lai ti mi le ho aw dah a tha deuh ti mi khi i zuam a si. Cun, zei bantuk program pohpoh ah a hnulei in tha tein timhtuahnak tampi a um. TV i kan hmuh mi vial khi a si lo. Atu Chin Idol kan tuah mi cu a caan a tlawm. Aa zuam mi zong an vantha ka tinak cu a dang Kawlram zuamnak hmanh ah atu bantuk music band a tha mi he i zuam a si lem lo.  Ngakchia pawl ca zong ah hmuhtonnak tha ngai a si. Duron Band zong nih miphun ca ah ti in an rat ve mi a si. Kha bantuk band tling in sak hi a sa mi ca zong ah a har deuh. Biana ah music a um cia mi ah minus key in va sak le karaoke ti bantuk in sak khi cu a fawi ngai i tha zong a dam. Full band in sak khi cu lungthin zong phundang pi a si i ngakchia aa zuam mi zong an lau pah mi kha an mawh lo.

Hakhanet – Miphun dang sin in kan i cawn awktlak na ti mi tah?

Sung Tin – Kawl hi khuaruahhar ngai cu an si. Ngamu man tluk an thiam ah khin fang khat man tluk mahle mah i zumhnak an ngei. Chin miphun hi kan i tangdor kan ti hnga maw, bianabia ah kanmah hi fang khat tlai in va thiam deuh usih law kan i zumhnak kha pia sawm nga tluk hmanh a um lo. Zei poh ah khin annih cu Yah de an ti ko. Sak taktak tik ah cu tluk pi cu a si lo na khan an i zumhnak cu a sang taktak. Kannih Laimi cu kan thiam taktak ko mi hmanh kha kan ngamh setsai lo. Mah kan lungput te kha cu pah hna seh law thlau hna seh ti ka duh.

Cun, zuamnak an ngei tuk. Bianabia ah hla a sa ding mi cu dawh a hauh ca ah tamh dan an cawng ti bantuk,  Galaxy Star ah video kan i thlak lio ah hin Korea director pawl he kan si i Korea pawl sin hin riantuan ning cawn awk tampi ka ngei. Live hi suimilaam 9:00 ah thlah ding a si ahcun chun suimilaam 12:00 ah kan phan dih cang. Kanmah Judge pawl zong nih an kan chimh ning tein um dih a hau. Practice an tuah mi zong voi khat hnih lawng siloin voi li nga pi khi an tuah. A caan hmaan tein an tuah. Pakhat le pakhat lungtlin lo nak a um zong ah an i chim colh. Kannih Laimi cu veelhle kan hmang pah. Bia dawh tuk chim zong khi a tha tuk ko nain a that dih lo caan zong a um ve.

Timhtuahnak hi cu tampi ngeih kan hau. Eih-Mat-Sone-Ya, Galaxy Star le a dangdang zuamnak zong hi TV chung kan hmuh hna hlan ah timhtuahnak tampi an ngei. Annih cu live in TV an thlah tik ah  Kanmah pawl, aa zuam mi pawl le director pawl tibantuk nih thlah hlan hrimhrim ah timhtuahnak tampi an rak tuah cang.  Hmailei ah timhtuahnak le caan tam deuh kan pek ah cun hi nakin kan sang chinchin ko lai tiah ruahnak ka ngei.

 

Hakhanet – Chin mino hna nih hlasaknak lei in Myanmar level tiang phanh khawh nakding ah zeidah tuah a herh tiah na ruah?

Sung Tin – Atu zong hla zuamnak kip ah kanmah Chinmi tampi an i tel. David Lai zong zuamnak in ram pumpi nih theih mi ah aa chuah. Cun, Nicolas, Fred, Dika le Jenevi Sui tibantuk pawl a thiam mi le quality a ngei taktak mi hlasak thiam tampi an chuak.  Kei cu Kawl ram level hmanh ka ti lo. A herh ahcun vawlei  cung tiang zong in ngamh ko hna seh. Hmun dang ram dang ah Chinmi kan tam tuk.  US le Europe ti bantuk ah a um mi kan unau hna i an fale ah pahrang a ngei mi an tam tuk ko. Kanmah zong Kawl ram ah kan um i  Kawl ram level kan ti i mu, hmailei ahcun Kawl ram level hmanh a si lo, vawlei cung minthang hmanh aa chuah kho ding kan Chin miphun chung ah an um ko lai ti zumhnak ka ngei.

Hakhanet – Tutan Chin Idol ah Top – 10 a phan mi hna chung in Myanmar Idol le Eih-mat-sone-ya ti bantuk ah aa zuam kho lai tiah an ruah mi an um maw?

Sung Tin – Kannih cu a caan a tlawm i zaan thum te lawng a si tik ah a palh zong ka palh sual lai. Ruah lo leeng in aw tha tampi ka hmuh hna. Myanmar ram level tiang zong i zuam hna seh ti ka duh. An i timh mi khi Chin Idol tiang lawng si hlah seh ti ka duh. Mah nak kau deuh pi in thanchonak ca ah timhtuahnak ngei hna seh ti ka duh. Kan i hmuh tonnak a caan a tawi tuk tik ah a leeng lei voi khat hnih an hlasak ngaih men in chim awk a tha lo.

Hakhanet – Micheu nih cun Chin Idol nih Chin miphun a huap lo. Hakha Thangtlang ca lawng a si a ti mi an um. Nang nih tah zeitin dah na hmuh?

Sung Tin – Atu zong hi CACC hruainak thawng in tuah a si i CACC nih hruainak um hlah seh law a thawktu zong an um hlei fawn lo. An tuah khawh mi cung ah i lawmh awk a si. Keimah pumpaak ruahnak chim ah cun, Tedim nih Tedim hla sa ko seh, Mara pa nih Mara hla sa ko seh, Asho pa nih Asho hla a sak ko lai. Mahle hla cio sa ko hna seh law kan dihlak in i tel kho usih. Puai kan tuah ti lio nakin kha bantuk timhtuahnak caan kha tampi laak a hau.

Media lei thawngthanhnak zong kaupi in tuah a hau. Chin miphun kan dihlak in kan i tel dih khawh nakding le zuam ding in an lung a thawh nakding ah faakpi in riantuan a hau. Cu hnu lawng ah mah nak kau deuh in kan tuah khawh lai. Atu cu Khrihfa lei in a si tik ah kanmah Chinmi chung zong ah Khrihfa a si lo mi tampi an um. Annih ca ah cun tlawmpal rikhiah mi khi a lo kan ti lai cu ti. Cucaah cun Khrihfa nih hruai lo mi le Chin Idol ca ah a dang tein a dir kho mi committee pakhat a herh. Committee chung zong ah kanmah Hakha le Thantlang lawng kan si lai lo. Chinram hmun kip in a za ti mi le miphun a huap kho mi i tel kho hna seh law hi nakin a kau kho deuh lai ti zumhnak ka ngei. Tu kum cu Hakha ah kan tuah lai, hmaikum cu bianabia ah khua dang ah siseh ti si seh law a tha chinchin lai ti ka ruah.

Tu tan CACC hruainak in an tuah mi hi a tha lo ka ti hrimhrim lo. Anmah cu a thoktu an si ca ah soisel zong an tong bik ko lai.  Asinain anmah nih a thawk lo ahcun a tuahtu an um hlei lo.

Biaruahtu: Mai Zai Iang

(Hakhanet ah tlamtling deuh in kan rak thlah lai)

 

LEAVE A REPLY

Please enter your comment!
Please enter your name here